Navigation

Inhaltsbereich

Incumbensa Schneider concernent l'adattaziun da la progressiun reala

Sessiun: 02.09.2023

Progressiun reala – er numnada progressiun «chauda» – signifitga, che las persunas obligadas da pajar taglia sa ruschnan cuntinuadamain sin stgalims da progressiun pli auts en consequenza dal creschament economic real. Per l'ina ha quai l'effect che la grevezza fiscala s'augmenta pli fitg che las entradas realas. Per l'autra sa ruschnan adina dapli persunas obligadas da pajar taglia sin il stgalim da progressiun il pli aut. Quest fatg impedescha il princip da l'imposiziun da taglia tenor la capacitad economica. In studi dad Avenir Suisse ha mussà, che l'augment real dals salaris per 8,4 pertschient tranter il 2010 ed il 2020 ha chaschunà, che las chasadas svizras pajan – pervia da la progressiun chauda – 800 milliuns francs dapli taglia federala directa che quai ch'ellas stuessan, sche lur grevezza fiscala fiss medemamain s'augmentada proporziunalmain, q.v.d. per 8,4 pertschient.

Entant che la progressiun fraida, che sa basa sin l'inflaziun, vegn cumpensada en il chantun Grischun, n'è quai betg il cas tar la progressiun reala. Las sutsegnadras ed ils sutsegnaders incumbenseschan perquai la Regenza d'examinar ina futura cumpensaziun da la progressiun reala, e quai en il rom da la realisaziun da l'incumbensa Hohl concernent distgargias fiscalas per famiglias e per persunas spezialisadas.

Cuira, ils 2 da settember 2023

Schneider, Hohl, Zanetti (Landquart), Altmann, Bergamin, Berther, Berweger, Bettinaglio, Binkert, Brandenburger, Brunold, Bundi, Candrian, Collenberg, Cortesi, Crameri (Li Curt), Crameri (Surava), Danuser (Cuira), Danuser (Cazas), Della Cà, Dürler, Epp, Föhn, Furger, Gansner, Hartmann, Heini, Holzinger-Loretz, Jochum, Kohler, Loepfe, Loi, Luzio, Maissen, Mani, Metzger, Michael (Donat), Mittner, Morf, Natter, Oesch, Rageth, Righetti, Roffler, Rüegg, Said Bucher, Saratz Cazin, Schutz, Solèr, Tanner, Thür-Suter, Tomaschett, Ulber, von Ballmoos, von Tscharner

Resposta da la regenza

Cun l'incumbensa ch'è vegnida inoltrada ils 2 da settember 2023, duai la Regenza vegnir incumbensada d'examinar ina futura cumpensaziun fiscala da la progressiun reala (chauda), e quai en il rom da la realisaziun da l'incumbensa Hohl concernent distgargias fiscalas per famiglias e per persunas spezialisadas. En quest connex ve­gni sa referì a l'analisa dad Avenir Suisse ch'è vegnida publitgada l'avust 2023 cun il titel «Warme Progression, für die Eliminierung einer steuerlichen Unbekannten».

La Regenza sustegna quest giavisch d'examinar ina futura cumpensaziun da la pro­gressiun reala e da l'integrar en la preschentaziun generala per la realisaziun da l'incumbensa Hohl. L'analisa dad Avenir Suisse mussa, che las pajas nominalas creschentas vegnan suttamessas a tariffas da taglia pli autas e che mo l'augment chaschunà da l'inflaziun, l'uschenumnada progressiun fraida, vegn cumpensada tar las taglias da la Confederaziun, dal chantun e da las vischnancas. La cumpart che resulta da l'augment da la capacitad da cumpra, la progressiun reala (chauda), na vegn oz però cumpensada sin nagin plaun statal. Tenor il studi dad Avenir Suisse ha quai cumprovadamain chaschunà – almain sin plaun federal – in augment latent da la quota fiscala, e quai cun ina legitimaziun democratica disfavuraivla.

Cun realisar l'incumbensa Schneider ston vegnir examinads differents aspects che han ina influenza sin il svilup da la quota fiscala dal chantun e da las vischnancas. Quai èn per exempel la cumpensaziun automatica da la progressiun fraida, l'adatta­ziun dals pes da taglia da las vischnancas e dal chantun, las revisiuns da la Lescha da taglia dal chantun, las valurs directivas da la politica da finanzas dal Cussegl grond concernent la quota statala chantunala e la grevezza fiscala ubain ulteriuras prescripziuns dal dretg constiziunal. Plinavant stoi vegnir examinà, co che la con­gruenza po vegnir mantegnida en il sistem fiscal actual resp. envers auters geners da taglia. E betg sco ultim vegn ins a stuair examinar, co che las consequenzas finanzialas pudessan vegnir stimadas, sco er co ch'ins pudess cuntanscher la rea­lisabladad pratica sulettamain sin plaun chantunal.

Sa basond sin questas explicaziuns propona la Regenza al Cussegl grond d'acceptar l'incumbensa qua avant maun.

11 d'october 2023