En proceduras davant las autoritads administrativas communalas, regiunalas e chantunalas e davant la Regenza na valan naginas vacanzas da dretgira, davant dretgira percunter bain (cf. art. 39 LGA). Durant questas vacanzas da dretgira èn da princip suspendids tscherts termins legals e giuridics (art. 39 LGA). Regulaziuns divergentas, tenor las qualas las vacanzas da dretgira na valan betg, existan per exempel en il dretg d'acquisiziun (cf. art. 56 al. 2 CIAP; DG 803.710).
L'interrupziun dals termins ha in effect dubel: D'ina vart n'han per regla lieu naginas tractativas giudizialas cun partidas durant questa perioda. Da l'autra vart vegnan termins currents interruts per la durada da las vacanzas da dretgira. Tut en tut èn ils termins da proceduras giudizialas administrativas en noss chantun suspendids durant circa 2 mais per onn (art. 39 al. 1 LGA). En spezial sch'ins considerescha il termin da recurs da 30 dis, ch'è gia fitg lung en cumparegliaziun cun auters chantuns (cf. art. 52 ed art. 60 LGA), ha questa suspensiun dals termins consequenzas considerablas per la durada da las proceduras.
Sin basa dal dretg federal na giaudan nossas dretgiras regiunalas e la Dretgira chantunala naginas vacanzas da dretgira en las proceduras penalas; las autoritads da mediaziun ed ils uffizis da mediaziun er betg (art. 145 al. 2 CPC). Er las dretgiras civilas dal Grischun n'enconuschan betg vacanzas da dretgira e termins suspendids en las proceduras summaricas (art. 145 al. 2 CPC). Talas proceduras cumpiglian la gruppa da cas la pli gronda.
En cas da proceduras cuntradictoricas, nua ch'èn involvidas duas partidas, ha ina da quellas savens interess d'accelerar la procedura e l'autra da ralentar tala. Da l'autra vart stat l'interess general da liquidar las proceduras en moda effizienta e svelta. Las vacanzas da dretgira retardeschan ils acts processuals e prolungheschan massivamain las proceduras. Ina motivaziun fundada, pertge ch'i duain valair vacanzas da dretgira per recurs giudizials administrativs, ma betg per recurs administrativs (davant la Regenza u davant ils departaments chantunals), n'è betg objectivamain evidenta, ni per las persunas che tschertgan dretg ni per las instituziuns. Ultra da quai prenda la dretgira – er senza la suspensiun da termins – resguard sin absenzas pervia da vacanzas, cura ch'ella fixescha termins per tractativas. Per tals motivs conceda ella per regla tschertas prolungaziuns da termins.
Nus faschain perquai la proposta d'abolir l'art. 39 da la Lescha davart la giurisdicziun administrativa (LGA; DG 370.100), e quai senza cumpensaziun.
Cuira, ils 2 da settember 2023
Metzger, Crameri (Surava), Wieland, Adank, Beeli, Berther, Berweger, Binkert, Brandenburger, Brunold, Butzerin, Candrian, Casutt, Censi, Collenberg, Cortesi, Crameri (Li Curt), Danuser (Cazas), Della Cà, Dürler, Favre Accola, Gansner, Gort, Grass, Krättli, Lamprecht, Lehner, Mani, Morf, Rauch, Roffler, Salis, Sax, Spagnolatti, Stocker, Tanner, Tomaschett, Ulber, Walser, Weber