Gia oz spetgan las chatschadras grischunas ed ils chatschaders grischuns cun fevra la proxima stagiun da chatscha che cumenza quest onn gia il 1. da settember.
Ellas ed els prendan las emprimas mesiras. Equipads cun il perspectiv e cun il telescop passentan ellas ed els mintga minuta libra en il territori da chatscha. Passiunadamain vegni "spievlà", observà la selvaschina e sias disas. A chasa vegnan rimnads ils utensils da chatscha, las victualias e las bavrondas per il transport en la chamona da chatscha. Èn vegnidas pajadas las taglias e l'assicuranza obligatorica da responsabladad? Èn enconuschentas las novaziuns las pli impurtantas da la lescha da chatscha? Han ellas ed els regulà persunalmain las armas da chatscha, e quai mo en ils lieus ch'èn vegnids inditgads da las vischnancas, sco che la lescha prescriva?
E la finala, cura e nua pon ellas ed els retrair la patenta da chatscha, per terminar las preparaziuns?
En il fegl uffizial dal chantun Grischun dals 6 d'avust 2009 èn publitgads ils lieus, las datas e las uras da tut ils posts da vendita uffizials da patentas che valan a partir dals 17 d'avust.

Nov! Retrair las patentas da chatscha per assegn tar tut ils posts uffizials d'emissiun da patentas
Quai ch'era pussaivel fin ussa mo tar il biro per passaports e patentas, è oz pussaivel er en cas da venditas uffizialas da patentas tras ils organs da surveglianza da chatscha, numnadamain da retrair per assegn las patentas da chatscha. L'uffizi da chatscha e pestga accepta cartas da debit sco MaestroCard u PostCard, tar las qualas l'import che sto vegnir pajà vegn deducì directamain e senza cumissiun da Voss conto. Attenziun: cartas da credit sco MasterCard u Visa na vegnan betg acceptadas sco meds da pajament. Per garantir in pajament senza incaps, supplitgain nus las chatschadras ed ils chatschaders che pajan per assegn da s'atschertar ordavant che la carta saja cuvrida suffizientamain.

Nus As giavischain ina buna mira ed ina ritga preda!

Gremi: Uffizi da chatscha e pestga dal Grischun
Funtauna: rg Uffizi da chatscha e pestga dal Grischun