Sut il titel "Las tschintg meglras" èn las destinaziuns d'excursiun las pli bellas dals pajais da l'ARGE ALP vegnidas cumpiladas ussa en in unic manual. Uschia pon persunas interessadas tscherner ord in vast spectrum da purschidas. "La finamira è quella da rinforzar la conscienza per il spazi da viver alpin cuminaivel", di Luis Durnwalder, guvernatur da la provinza Bulsaun-Tirol dal sid e parsura actual da l'ARGE ALP.
Il project "Las tschintg meglras" è vegnì preschentà en il rom da la sesida da la cumissiun da direcziun da la cuminanza da lavur da las regiuns alpinas (ARGE ALP) a Kasern (Ahrntal/Tirol dal sid). El cuntegna las tschintg destinaziuns d'excursiun las pli bellas da mintga regiun da l'ARGE ALP. Quellas duain esser propostas d'excursiun cunzunt per persunas d'instrucziun sco er per manadras e per manaders da gruppas da giuvenils. Tar mintga destinaziun stattan a disposiziun ina curta descripziun, intgins detagls tecnics sco er in'elavuraziun spezialisada e didactica da mintga purschida.
"Questa publicaziun na duai betg mo sviluppar la conscienza per il spazi da viver alpin cuminaivel gia tar giuvenils, mabain er promover la collavuraziun pedagogica transcunfinala", accentuescha il guvernatur Luis Durnwalder, che presidiescha actualmain l'ARGE ALP. Tant areguard il cuntegn sco er areguard la lingua reflecteschan las contribuziuns la diversitad dal spazi da viver alpin.
Sco destinaziun dal Grischun vegn preschentà tranter auter il territori da la funtauna dal Rain anteriur en Surselva. Tar las excursiuns recumandadas tutgan er il territori da la Mantogna-Tumleastga cun la Viamala, il museum da minieras Schmelzboden a Tavau, la cuntrada autalpina da l'Engiadin'ota sco er il parc naziunal.
Il project "Las tschintg meglras" è gia vegnì instradà l'onn passà sut il presidi da la Baviera. Publitgadas vegnan las propostas d'excursiun en furma da manual sco er sin la pagina d'internet da l'ARGE ALP sut
www.argealp.org.
L'ARGE ALP cumpiglia las regiuns, ils chantuns ed ils pajais federativs Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg. Sco emprima cuminanza transcunfinala da regiuns ha ella fullà via per ina nova conscienza da las regiuns en l'Europa. Dapi la fundaziun da l'ARGE ALP l'onn 1972 s'engaschan ses commembers per in svilup persistent dal territori alpin. Il presidi mida mintga onn; actualmain vegn l'ARGE ALP presidiada dal Tirol dal sid.
Gremi: chanzlia chantunala dal Grischun
Funtauna: rg chanzlia chantunala dal Grischun