Navigation

Inhaltsbereich

  • Erste Mitteilung
  • Neuen Beitrag einfügen
Las presidentas ed ils presidents da tut ils parlaments chantunals fan ina visita al chantun Grischun. La scuntrada da quest onn ha lieu venderdi, ils 6 da november 2009, a Cuira ed a Glion. Ella serva en emprima lingia al barat d'experientschas sco er a la tgira da las relaziuns amicablas. Per l'emprima giada ha questa occurrenza lieu en il Grischun.

A la scuntrada vegnan a sa participar las presidentas ed ils presidents sco er las vicepresidentas ed ils vicepresidents dals parlaments da tut ils chantuns. Christian Rathgeb, il president dal cussegl grond dal Grischun, vegn a beneventar las participantas ed ils participants a las 10.00 en l'edifizi dal cussegl grond a Cuira.

Suenter il pled da bainvegni è previs in viadi cun la Viafier retica a Glion. Là vegnan las participantas ed ils participants beneventads da Martin Montalta, il president da la citad, ed envidads ad in gir tras la citad da Glion. Suenter gentar vegn Jakob Kellenberger, il president dal comité internaziunal da la crusch cotschna CICC, a far in referat sco oratur prominent.

Questas scuntradas da las presidentas e dals presidents dals parlaments chantunals han lieu mintg'onn e servan al barat d'experientschas ed a la tgira da las bunas relaziuns federalas amicablas tranter ils parlaments chantunals. Organisada vegn la scuntrada quest onn da la conferenza da las presidentas e dals presidents dal cussegl grond e dal secretariat dal cussegl grond.


Infurmaziun per las medias:
Las collavuraturas ed il collavuraturs da las medias pon assister al bainvegni a las 10.00 en l'edifizi dal cussegl grond. La radunanza stat er gugent a disposiziun per laschar far fotografias en l'edifizi dal cussegl grond.


Infurmaziuns:
Christian Rathgeb, president dal cussegl grond, tel. 081 258 38 14 / 076 576 18 43


Gremi: conferenza da las presidentas e dals presidents dal cussegl grond
Funtauna: rg conferenza da las presidentas e dals presidents dal cussegl grond
Neuer Artikel