En il chantun Grischun pon persunas che han ina ristga da cumplicaziun pli gronda sco er il persunal da sanadad sa laschar vaccinar a partir da mesemna, ils 11 da november 2009, cunter la grippa pandemica A H1N1 tar ils medis districtuals sco er en ils ambulatoris dals ospitals publics.
Actualmain vegnan ils vaccins confecziunads e furnids als posts da vaccin fin mardi, uschia che l'acziun da vaccinar po cumenzar en tut il Grischun a partir da mesemna, ils 11 da november 2009.
L'emprima fasa è mo per gruppas da ristga
Perquai che la quantitad da vaccins che la confederaziun metta actualmain a disposiziun na basta betg per vaccinar tut la populaziun, pon en in'emprima fasa sa laschar vaccinar mo quellas persunas che han – en cas d'ina grippa – ina ristga pli gronda da survegnir cumplicaziuns. En questa fasa duain er las persunas che han in stretg contact cun persunas da ristga sco er il persunal dal sectur da sanadad dals ospitals, da la spitex e da praticas da media u da medi sa laschar vaccinar. Concretamain sa tracti da las suandantas gruppas da persunas:
- persunas che lavuran en il sectur da sanadad e che han contact cun pazientas e cun pazients sco er persunas che tgiran poppins sut 6 mais;
- dunnas en speranza (en spezial a partir da la 14avla emna) e dunnas che han gist parturì;
- persunas a partir da 6 mais che han malsognas cronicas dal cor e dals pulmuns (en spezial sbagls dal cor innats, insuffizienza dal cor, asma bronchiala, mucoviscidosa), malsognas metabolicas cronicas (en spezial diabetes tip II), insuffizienza dals gnirunchels, malsognas dal sang u immunosuppressiun;
- persunas da contact (medema chasada) da gruppas da ristga u da poppins sut sis mais.
Questas gruppas da ristga pon sa laschar vaccinar a partir da mesemna, ils 11 da november 2009, en las praticas dals medis districtuals, da lur substitutas e da lur substituts sco er en ils ambulatoris dals ospitals publics dal chantun, e quai senza preannunzia durant las uras publitgadas.
La segunda fasa è per tut la populaziun
Apaina ch'igl è avant maun vaccin avunda, vegn er purschida la vaccinaziun per tut las parts da la populaziun sco er dal persunal da sanadad da las chasa da persunas attempadas e da tgira. Quai dastgass esser il cas a partir dal cumenzament da december 2009. En questa segunda fasa pon sa laschar vaccinar tut las persunas en il Grischun, e quai en tut las praticas da medias e da medis dal chantun (medias e medis da famiglia, medias e medis d'uffants sco er medias e medis da dunnas). Davart la partenza da la segunda fasa vegn il chantun a communitgar a temp util.
Ulteriuras infurmaziuns
Ina glista dals posts da vaccinaziun e da lur uras d'avertura vegn publitgada mesemna en la pressa quotidiana, tramessa a las vischnancas per la publicaziun sco er messa sin la pagina d'internet da l'uffizi da sanadad. Ulteriuras infurmaziuns davart la grippa pandemica e davart l'acziun da vaccinaziun pon ins chattar sin la pagina d'internet da l'uffizi da sanadad sut www.gesundheitsamt.gr.ch u sut www.pandemia.ch.
Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- dr. Martin Mani, medi chantunal, tel. 081 257 26 46
Gremi: uffizi da sanadad
Funtauna: rg uffizi da sanadad