Navigation

Inhaltsbereich

  • Erste Mitteilung
  • Neuen Beitrag einfügen
En il Grischun cumenza la segunda fasa da l'acziun da vaccinar cunter la grippa pandemica A H1N1. A partir da questa emna pon tut las persunas sa laschar vaccinar voluntarmain tar lur media u tar lur medi da famiglia.

Dapi ils 11 da november 2009 vegnan vaccinads en tut il chantun Grischun pazientas e pazients da ristga cunter la grippa pandemica A H1N1. Per motivs logistics èn ils posts da vaccinar stads limitads en questa emprima fasa da l'acziun da vaccinar sin ils medis disctrictuals e sin ils ospitals publics.

La segunda fasa cumenza pli baud che spetgà
Ils 13 da november 2009 ha Swissmedic admess Celtura® sco terz vaccin. Il glindesdi ha la confederaziun ussa mess a disposiziun als chantuns contingents considerabels sco er empermess quantitads pli grondas. Cun l'admissiun dal terz vaccin è la situaziun logistica sa simplifitgada fermamain, uschia ch'il chantun po proveder pli baud che spetgà las praticas da las medias e dals medis cun il vaccin e cumenzar cun la segunda fasa da l'acziun da vaccinar.
A partir da questa emna n'è la vaccinaziun pia betg pli restrenschida a las gruppas da ristga. A partir da quel mument pon tut las persunas che giavischan quai sa laschar vaccinar da lur media u da lur medi da famiglia. Persunas sur 40 onns stuessan sa laschar vaccinar duas giadas entaifer in intervall da trais emnas. La vaccinaziun è anc adina gratuita per la singula u per il singul. I na vegnan incassadas naginas franschisas e naginas resalvas persunalas.
Las medias ed ils medis da famiglia dal Grischun èn vegnidas infurmadas ordavant dal medi chantunal davart il cumenzament da la segunda fasa da l'acziun da vaccinar. Las praticas da las medias e dals medis han survegnì la pussaivladad d'empustar tschertas quantitads dal vaccin.
Vinavant stgars resta il vaccin Focetria®, ch'è reservà per dunnas en speranza e per uffants cun malsognas cronicas. Tuttina èsi pussaivel ch'ina quantitad limitada po vegnir attribuida tant a medias ed a medis d'uffants sco er a medias ed a medis da dunnas.

Ils posts da vaccinar tar ils medis districtuals ed en ils ospitals restan averts
Ils posts da vaccinar ch'existan tar ils medis districtuals ed en ils ospitals restan averts.
Ulteriuras infurmaziuns davart la grippa pandemica e davart l'acziun da vaccinar pon ins chattar sin la pagina d'internet da l'uffizi da sanadad sut www.gesundheitsamt.gr.ch u sut www.pandemia.ch.


Infurmaziuns:
- dr. Martin Mani, medi chantunal, tel. 081 257 26 46


Gremi: uffizi da sanadad
Funtauna: rg uffizi da sanadad
Neuer Artikel