En quatter curtins chantunals a Cuira vegnan installads quest atun novs sistems da sauar. Quels duain meglierar las cundiziuns da viver da las plantas e dals bostgs ch'èn per part degns da vegnir protegids.

Durant lur lunga vita èn bostgs exposts a blers extrems da l'aura. La stgaudada globala cun las periodas sitgas che sa manifesteschan adina pli savens en colliaziun cun grondas chalurs ha consequenzas considerablas per las plantas. Ella indeblescha en spezial la resistenza dals bostgs vegls ch'èn degns da vegnir protegids.

En vista a quests fatgs survegnan sistems da sauar per parcs e per spazis verds publics ina impurtanza adina pli gronda. L'uffizi da construcziun auta ha dà l'incumbensa d'acquistar installaziuns efficazias. Las proximas emnas vegnan installads sistems da sauar sutterrans en il curtin dal museum retic ch'è vegnì concepì da nov, sin la plazza da la regenza, en il curtin da la regenza cun ses fau purpur imposant sco er en l'iert dal museum d'art dal Grischun cun ses sequoias unics. Grazia ad in sistem automatic da ventils e da raits da conducts vegn l'aua dada directamain a las ragischs ed als secturs dal terren che ston vegnir sauads. Quai meglierescha la vitalitad e prolunghescha la vita dals bostgs.

Sco cumplettaziun vegnan ultra da quai plantadas plantas cun flurs rosas ed alvas sin la plazza da la regenza cun sias saivs vivas e cun sias chaglias. Questas strivlas da plantas ch'èn accordadas cun las relaziuns da glisch che vegnan chaschunadas da las differentas fasas da fluriziun dals tigls e dals ischis flureschan fin tard en per l'atun e dattan a la plazza da la regenza in rom degn ed elegant.


Infurmaziuns:
Markus Dünner, architect chantunal, uffizi da construcziun auta, tel. 081 257 36 31


Gremi: uffizi da construcziun auta
Funtauna: rg uffizi da construcziun auta