Ina delegaziun dal cussegl dal chantun da Son Gagl fa mardi, ils 8 da december 2009, durant la sessiun da december, ina visita a las collegas ed als collegas grischuns a Cuira.

A la testa da la delegaziun songagliaisa da dudesch persunas stattan la presidenta dal cussegl dal chantun Elisabeth Schnider ed il vicepresident dal cussegl dal chantun Walter Locher. Tranter auter vegnan els accumpagnads da las deputadas e dals deputads Felix Bischofberger, Christian Rüegg, Donat Ledergerber, Michael Götte, Barbara Gysi, Andreas Hartmann, Susanne Hoare-Widmer, Thomas Ammann e Benedikt Würth.

Ils giasts dal chantun Son Gagl vegnan retschavids dal president dal cussegl grond Christian Rathgeb e da la vicepresidenta dal cussegl grond Christina Bucher-Brini. Da vart dal Grischun sa participeschan a l'inscunter plinavant ils presidents da fracziun. Il program prevesa d'assister l'avantmezdi a las tractativas currentas dal cussegl grond e da visitar il suentermezdi la citad veglia da Cuira. La visita serva en emprima lingia al barat d'experientschas sco er a la tgira da las relaziuns amicablas.


Infurmaziun per las medias:
A las 10.00 stattan la presidenta dal cussegl dal chantun Son Gagl Elisabeth Schnider, il president dal cussegl grond dal Grischun Christian Rathgeb sco er il vicepresident dal cussegl dal chantun Son Gagl Walter Locher e la vicepresidenta dal cussegl grond dal Grischun Christina Bucher-Brini a disposiziun per ina fotografia tar l'entrada da l'edifizi dal cussegl grond a Cuira.


Gremi: chanzlia chantunala dal Grischun
Funtauna: rg chanzlia chantunala dal Grischun