Il chantun Grischun è da nov commember associà en l'uniun dal spazi metropolitan da Turitg ed observatur permanent en la conferenza da las regenzas dal spazi metropolitan da Turitg.

La regenza dal chantun Grischun sa mussa cuntenta ch'il Grischun è vegnì acceptà ils 4 da december 2009 sco commember associà en l'uniun dal spazi metropolitan da Turitg. Gia in'emna avant ha la conferenza da las regenzas dal spazi metropolitan da Turitg beneventà il Grischun sco observatur permanent en lur circul.

Il chantun Grischun tgira ina rait da contacts vasts e flexibels. Sco chantun muntagnard ha el en spezial relaziuns tradiziunalmain bunas e multifaras cun chantuns, cun citads e cun vischnancas dal spazi metropolitan da Turitg. Quai è sta il motiv per la regenza grischuna d'engrondir e da rinforzar la collavuraziun cun il spazi metropolitan da Turitg. La regenza è persvadida ch'il chantun Grischun possia surpigliar – er sco commember associà e consultativ – ina rolla impurtanta sco liom tranter la citad e la champagna, tranter la muntogna e la val e contribuir sco partenari fidà ina part essenziala a la concepziun da la politica futura d'aglomeraziun, da metropola e dal territori da muntogna.

L'uniun e la conferenza da las regenzas dal spazi metropolitan da Turitg èn vegnidas fundadas ils 3 da fanadur 2009. Il spazi metropolitan da Turitg cumpiglia actualmain 236 vischnancas en 8 chantuns e furma ina regiun che gioga ina rolla centrala en ils conturns internaziunals e per l'economia publica da la Svizra.

Gremi: regenza
Funtauna: rg chanzlia chantunala dal Grischun