Cuntegn da la pagina

Il project per la rait radiofonica da segirezza POLYCOM dal Grischun è vegnì lantschà uffizialmain cun suttascriver il contract

  • Erste Mitteilung
  • Neuen Beitrag einfügen
La scheffa dal departament da giustia, segirezza e sanadad, cussegliera guvernativa Barbara Janom Steiner, ed il schef dal corp da guardias da cunfin, Jürg Noth, han suttascrit oz a Cuira ina cunvegna per realisar la rait radiofonica da segirezza POLYCOM en il chantun. Uschia vegn lantschà uffizialmain il project per realisar la part chantunala vi da la rait radiofonica da segirezza. Tras la cunvegna surdat il chantun la direcziun dal project al corp da guardias da cunfin.

La buna collavuraziun tranter il chantun ed il corp da guardias da cunfin vegn pia amplifitgada per in ulteriur sectur. La polizia chantunala dal Grischun ed il corp da guardias da cunfin mainan ina centrala d'alarm e d'acziuns communabla. La polizia chantunala ed il corp da guardias da cunfin collavuran en il territori da cunfin sco er sin las vias dal Güglia, da l'Alvra e dal Flüela, e quai per garantir la segirezza interna ademplind las incumbensas da la polizia.

Per realisar sia part vi da la rait radiofonica da segirezza POLYCOM èsi interessant per il Grischun or da plirs motivs da surdar la direcziun dal project al corp da guardias da cunfin. Il corp da guardias da cunfin che ha las enconuschientschas necessarias per realisar il project installescha atgnas staziuns da basa en la regiun da cunfin da la Svizra e pia er en la regiun da cunfin dal chantun Grischun. La ristga da las investiziuns daventa uschia calculabla per il chantun.

Plinavant sa laschan cuntanscher sinergias tar la realisaziun dal project, sche tut las staziuns da basa vegnan construidas en il chantun tras il corp da guardias da cunfin, e pia er respargns da custs. Per in provediment radiofonic suffizient dal chantun dovri tut en tut 91 staziuns da basa en l'entir Grischun. 57 staziuns da basa vegnan construidas e finanziadas dal corp da guardias da cunfin, il chantun sto finanziar 34 staziuns da basa. Las staziuns da basa che vegnan construidas dal corp da guardias da cunfin servan en emprima lingia a satisfar ils agens basegns. Grazia a l'engrondiment dals chanals ch'è vegnì finanzià dal chantun pon questas staziuns da basa er satisfar ils basegns da tut las organisaziuns da segirezza e d'emprim agid dal chantun.

La rait radiofonica da segirezza POLYCOM dal Grischun è ina part da la rait radiofonica da segirezza naziunala POLYCOM ch'è en elavuraziun. Cun questa rait radiofonica unitara en l'entira Svizra pon communitgar tut las organisaziuns da segirezza e d'emprim agid, sco la polizia, il corp da guardias da cunfin, l'armada, ils pumpiers, la protecziun civila ed ils servetschs da salvament, e quai senza che lur discurs possian vegnir tadlads giu.

La summa brutta d'investiziuns dal chantun importa ca. 44 milliuns francs. Il cussegl grond ha concedì il credit necessari en la sessiun d'avrigl 2009. En la cunvegna vegn il corp da guardias da cunfin envidà da resguardar sche pussaivel firmas indigenas cur ch'el prepara la surdada da las incumbensas dal chantun per lavurs d'impressari e per l'infrastructura radiofonica. La surdada da las incumbensas sco tala vegn fatga, en enclegientscha cun la direcziun dal project, tras il chantun. Il plan da termins prevesa che la nova rait radiofonica po vegnir messa en funcziun il pli tard la fin da l'onn 2012.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel