En il chantun Grischun duai il nov rom "enconuschientscha da las religiuns ed etica" vegnir introducì a partir da l'onn da scola 2012/13 sin il stgalim superiur. La regenza grischuna ha approvà tant il concept general correspundent sco er la structura dal project per introducir quest rom.

Instradà emprims pass per l'instrucziun futura dal rom "enconuschientscha da las religiuns ed etica"
La regenza grischuna ha prendì enconuschientscha dal concept general e da la structura dal project per introducir il rom "enconuschientscha da las religiuns ed etica" ed ha incumbensà il departament d'educaziun, cultura e protecziun da l'ambient cun la realisaziun. Il concept prevesa d'introducir quest nov rom a partir da l'onn da scola 2012/13 sin il stgalim superiur da la scola populara. Il nov rom suttastat a la responsabladad dal stadi ed è obligatoric per tut las scolaras e per tut ils scolars. Resguardond las experientschas che vegnan fatgas, duai il rom vegnir instruì sin il stgalim primar a partir da l'onn da scola 2017/18.
Cun il "model 1+1" ha il cussegl grond fatg l'onn passà ina cuntraproposta a la "iniziativa d'etica". Questa cuntraproposta è vegnida sustegnida da las baselgias chantunalas ed acceptada dal pievel en la votaziun dal matg 2009. La decisiun dal pievel prevesa che las baselgias chantunalas dettian vinavant ina lecziun da religiun. Da nov vegn introducida ina lecziun "enconuschientscha da las religiuns ed etica" ch'è obligatorica per tut las scolaras e per tut ils scolars.
Ultra da quai fixescha il concept general ch'il nov rom "enconuschientscha da las religiuns ed etica" stoppia s'orientar uschenavant sco pussaivel tenor il "plan d'instrucziun da la Svizra tudestga 21", ina giada che quel è avant maun. En il decurs dals proxims quatter onns da scola planisescha il chantun dal rest da porscher a las persunas d'instrucziun actualas curs da qualificaziun cumplementara per il nov rom "enconuschientscha da las religiuns ed etica". Davart ils plans d'instrucziun definitivs, davart l'elecziun e davart la translaziun dals meds d'instrucziun sco er davart ils detagls da la qualificaziun cumplementara da las persunas d'instrucziun decida la regenza pli tard.
Sco proxim pass elavura ina gruppa da lavur il plan d'instrucziun per il stgalim superiur. Questa gruppa da lavur consista da represchentantas e da represchentants da las baselgias chantunalas sco er da l'uffizi per la scola populara ed il sport. Sco basa serva per quest intent il plan d'instrucziun da religiun vertent.

Da vischnancas e da regiuns

• Schlarigna: La regenza approvescha la revisiun parziala da la planisaziun locala da la vischnanca da Schlarigna dals 26 d'october 2009.

Gremi: regenza
Funtauna: rg chanzlia chantunala dal Grischun