Cuntegn da la pagina

Premi per il guaud da protecziun alpin 2009: Contribuziuns grischunas èn vegnidas premiadas a Bad Tölz

  • Erste Mitteilung
  • Neuen Beitrag einfügen
Sut la devisa "il guaud da protecziun protegia la patria" è vegnì surdà ils 29 da schaner 2010 en la chasa da cura da Bad Tölz per la quarta giada il premi internaziunal per il guaud da protecziun alpin da la cuminanza da lavur da las uniuns forestalas da las regiuns alpinas, e quai per prestaziuns extraordinarias che servan a mantegnair ed a meglierar il guaud da protecziun en il territori alpin. Sco gia l'onn precedent han er projects grischuns survegnì il premi. Il cusseglier guvernativ Stefan Engler è er sa participà a la surdada dal premi.

Numerus giasts dals territoris alpins, reunids en la cuminanza da lavur, che derivan da la Baviera, dal Tirol dal sid, dal Vorarlberg, dal Grischun, da la Carinzia e dal Liechtenstein, han dà suatientscha a l'invitaziun a Bad Tölz per s'infurmar davart ils megliers projects che pertutgan il guaud da protecziun e per far festa cun las persunas premiadas.
 
Dudesch projects èn nominads
Assistentas ed assistents da projects forestals, proprietarias e proprietaris da guaud, magistras e magisters sco er scolaras e scolars dals pajais da la cuminanza da lavur èn vegnids envidads a sa participar a la concurrenza. Dal dumber da record da 33 projects ha ina giuria internaziunala nominà 12 per las categorias "innovaziun e partenadi da guauds da protecziun", "projects da success", "projects da scola" e "lavur da publicitad" ed hà – per l'emprima giada – surdà in premi da renconuschientscha per in project extraordinari.

Suenter ina preschentaziun da multimedia da tut ils projects nominads, han las represchentantas ed ils represchentants politics surdà las trofeas a las victuras ed als victurs. Ils suandants dus projects dal chantun Grischun èn vegnids premiads:

- categoria "projects da success": project "20 onns suenter il Vivian – project per la reconstrucziun en la Sursassiala"
- premi da renconuschientscha per in project extraordinari: "Emnas da project en il guaud da muntogna sco lavuratori da furmaziun".

Ils ulteriurs premis principals èn vegnids surdads en la categoria "innovaziun e partenadi da guauds da protecziun" al project "offensiva dal guaud da muntogna" da la Carinzia, en la categoria "lavur da publicitad" als "dis forestals dal Liechtenstein 2009" ed en la categoria "projects da scola" al project "la natira sco stanza da scola e sco magistra" dal Tirol dal sid.

Ils projects grischuns che han survegnì il premi

20 onns suenter il Vivian – project per la reconstrucziun en la Sursassiala
Uffizis forestals da revier da Mustér, da Medel e da Tujetsch, uffizi forestal dal Grischun
Guauds da protecziun impurtants en la part sura da la Surselva èn vegnids destruids per part dal tuttafatg da l'orcan Vivian. 20 onns pli tard sa preschenta il territori en in stadi fitg legraivel ed exemplaric. Las mesiras differenziadas ch'èn vegnidas prendidas sin basa d'analisas scientificas èn sa cumprovadas fitg bain e porschan enconuschientschas impurtantas per schliar problems sumegliants en il futur.

Emnas da project en il guaud da muntogna sco lavuratori da furmaziun
Guaud da muntogna sco lavuratori da furmaziun, Thun
Il guaud da muntogna sco lavuratori da furmaziun realisescha dapi onns mintga onn cun passa 1000 giuvenils emnas da project en il guaud da muntogna. L'onn 2009 èn stadas activas en il guaud da protecziun sulettamain en il chantun Grischun passa 350 persunas da la Bassa. La direcziun professiunala tras il persunal forestal cun scolaziun pedagogica e cun gronda experientscha garantescha che las participantas e ch'ils participants chapeschan l'impurtanza dal guaud da protecziun e da sia tgira e ch'ellas e ch'els sa regordan da quai per vita duranta, e quai er sco futuras purtadras e sco futurs purtaders da decisiuns.

Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Reto Hefti, selvicultur chantunal, uffizi forestal, tel. 079 659 69 18

Gremi: uffizi forestal
Funtauna: rg uffizi forestal
Neuer Artikel