Cuntegn da la pagina

Deliberà la missiva tar la revisiun totala da la lescha d'energia

  • Erste Mitteilung
  • Neuen Beitrag einfügen
Il chantun Grischun vul reducir en moda persistenta il consum d'energias fossilas e promover pli intensivamain la midada vi sin energias regenerablas. La regenza grischuna ha deliberà la missiva correspundenta tar la revisiun totala da la lescha d'energia. Questa lescha prevesa da cuntanscher las finamiras, en spezial cun reducir en etappas il basegn d'energia termica maximalmain admissibel tar edifizis. Uschia duai vegnir gidà a cuntanscher las finamiras a lunga vista da la "societad da 2000 watts". Il cussegl grond vegn a tractar la fatschenta en la sessiun d'avrigl.

Cun la revisiun totala da la lescha d'energia dal chantun Grischun vul la regenza promover la politica chantunala d'energia e la far avanzar per in pass impurtant. La nova lescha d'energia ha en emprima lingia ils suandants intents: in'utilisaziun effizienta e persistenta da l'energia sco er in provediment d'energia economic ed ecologic. Plinavant duai vegnir reducì en moda persistenta il consum da purtaders d'energia fossils e duain vegnir utilisadas pli intensivamain las energias indigenas e regenerablas. Qua tras vul il chantun gidar a cuntanscher las finamiras a lunga vista da la "societad da 2000 watts". Quai vegn er fatg cun l'ambiziun ed en accordanza cun las stentas naziunalas ed internaziunalas da reducir l'emissiun da CO2 sin 1 tonna per onn per abitanta e per abitant.

Fixà finamiras liantas en la lescha
En ses element central fixescha il project da lescha da la regenza, che questas finamiras duain vegnir cuntanschidas en etappas che vegnan formuladas en moda lianta. Il potenzial il pli grond per reducir il consum d'energia sa chatta en ils edifizis sezs. Gia a partir da l'onn 2011 duai il basegn d'energia termica maximalmain admissibel per edifizis novs importar 40 pertschient damain che l'onn 2008. Quai correspunda circa al standard da MINERGIE actual senza ventilaziun. En ulteriuras etappas duai il basegn maximal d'energia termica vegnir reducì fin l'onn 2020 per 60 pertschient (circa il standard da MINERGIE-P actual) e fin l'onn 2035 schizunt per 80 pertschient. En cas d'edifizis existents pretendan las finamiras intermediaras, ch'èn prescrittas da la lescha, da reducir il basegn d'energias fossilas fin l'onn 2020 per 10 pertschient (fin l'onn 2035 per 25 pertschient) e d'al remplazzar per 10 pertschient (fin l'onn 2035 per 40 pertschient) cun energias regenerablas.

Las contribuziuns da promoziun vegnan augmentadas
Il chantun vul cuntanscher questas finamiras tranter auter cun augmentar las contribuziuns da promoziun sco er cun fixar prescripziuns liantas. A partir da l'onn 2011 quintan las autoritads cun expensas totalas annualas da 14.4 milliuns francs per l'entir program da promoziun nov. En quest connex importa la part dal chantun 8.9 milliuns francs. Quai èn var trais giadas dapli meds da promoziun che quai ch'il plan da finanzas vertent preveseva.

La nova lescha d'energia fixescha ch'il chantun concedia contribuziuns da promoziun per:
- sanaziuns cumplessivas d'edifizis;
- sanar indrizs tecnics d'edifizis existents, utilisond energias regenerablas (laina, sulegl, chalur da la terra e dals conturns);
- edifizis novs ed edifizis novs da substituziun che han in caracter exemplaric;
- meglierar il grad d'utilisaziun da process commerzials ed industrials;
- remplazzar ils stgaudaments electrics tras indrizs che utiliseschan energias regenerablas;
- indrizs energetics gronds d'impurtanza chantunala u regiunala.

En quai che reguarda las prescripziuns ed ils standards da construcziun surpiglia la nova lescha d'energia per gronda part il model da prescripziuns davart l'energia dals chantuns (MoPEC 2008) repassà da la conferenza da las directuras e dals directurs chantunals d'energia. Quai chaschuna er l'armonisaziun generala giavischada tranter ils chantuns.

Basa per il certificat energetic dals edifizis e nova regulaziun per stgaudaments al liber
Ultra da quai stgaffescha la revisiun totala da la lescha d'energia la basa, per ch'il certificat energetic chantunal dals edifizis (CECE) possia vegnir introducì en tut la Svizra en moda unitara. Per proprietarias e per proprietaris da chasas è il CECE in instrument d'infurmaziun facultativ che infurmescha – sco l'etichetta d'energia en cas d'apparats e da vehichels – davart il consum d'energia d'in edifizi.
Reglada da nov vegn er l'utilisaziun da stgaudaments al liber. Per l'utilisaziun commerziala da stgaudaments mobils al liber, sco per exempel radiaturs mobils, che chaschunan emissiuns da CO2, prevesa la lescha l'obligaziun da dumandar ina permissiun. Ina permissiun po vegnir dada, sche la gestiunaria u sch'il gestiunari cumpensescha il consum d'energia en la medema dimensiun cun cumprar certificats da CO2 u energias regenerablas.

Il chantun sco exempel
La finala fixescha la lescha d'energia ch'ils edifizis dal chantun stoppian sa distinguer en il futur tras in'utilisaziun exemplarica ed effizienta da l'energia. Concretamain duain – tenor la proposta da la regenza – edifizis chantunals novs ademplir a partir da l'onn 2011 il standard da MINERGIE-P e sanaziuns d'edifizis chantunals existents il standard da MINERGIE actual.

Ina legislaziun che s'orientescha als resultats
La nova lescha d'energia resguarda en quest connex ils princips d'ina legislaziun ch'è orientada als resultats. Quai vul dir, la legislatura ed il legislatur prescrivan las finamiras e fixeschan ils pass intermediars. La regenza elavura in concept d'energia da plirs onns che mussa, co che las finamiras duain vegnir cuntanschidas. Sch'i sa mussa che las finamiras na vegnan betg cuntanschidas, ston las pretensiuns energeticas e las mesiras da promoziun vegnir adattadas correspundentamain.


Infurmaziuns:
cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01


Gremi: regenza
Funtauna: rg chanzlia chantunala dal Grischun
Neuer Artikel