Cuntegn da la pagina

Inquisiziun tras la CdG

  • Erste Mitteilung
  • Neuen Beitrag einfügen

Tenor l'avis da la regenza èsi correct che la cumissiun da gestiun dal cussegl grond examinescha il cas Reinhardt e ch'ella fa urden cun quest scumbigl da speculaziuns e da supposiziuns. La regenza è gia antruras sa declerada pronta da render accessiblas a questa examinaziun tut las infurmaziuns e tut ils documents ch'èn a sia disposiziun.

La regenza resta tar sia opiniun ch'i saja stà correct d'accumpagnar activamain il cumandant da polizia cun sia malsogna e d'al laschar en ses uffizi. Questa tenuta sa basa sin ils fatgs ch'eran enconuschents a la regenza e sin la circumstanza ch'i n'ha dà ni eveniments che fissan stads relevants per la segirezza ni disturbis en la direcziun dal corp da la polizia durant il temp correspundent. Sche l'examinaziun avess da purtar auters resultats, vegn la regenza a sa fatschentar cun quels ed a sa metter a disposiziun a la discussiun publica.

Per la regenza èn impurtantas las suandantas constataziuns:

  • Igl è chaussa da la cumissiun da gestiun, co ch'ella vul manar l'inquisiziun. La regenza vegn a dar a la cumissiun tut las infurmaziuns giavischadas. Tenor l'avis da la regenza èsi en l'interess da tut las parts participadas che l'examinaziun vegnia fatga en moda seriusa e svelta a medem temp. 
  • I sto vegnir menziunà ch'ils rapports da las medias – che han scuvert ils ultims dis novs eveniments – èn sa basads considerablamain sin infurmaziuns dad infurmantas e dad infurmants che na sa preschentan betg persunalmain. Uschia vegni engrevgià d'eruir la vardaivladad dals cuntegns correspundents.

La regenza na vegn betg pli a s'exprimer davart singulas dumondas, fin che l'examinaziun da la cumissiun da gestiun n'è betg terminada. Resalvads restan eveniments extraordinaris.

Infurmaziuns:
president da la regenza Claudio Lardi, schef dal departament d'educaziun, cultura e protecziun da l'ambient, tel. 081 257 27 01


Gremi: regenza
Funtauna: rg chanzlia chantunala dal Grischun

Neuer Artikel