Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha prendì enconuschientscha ch'il project da votaziun davart la NGF grischuna è deplorablamain vegnì refusà. Il pievel grischun ha prendì questa decisiun suenter ina lunga fasa da discussiuns e da cuntraversas publicas. En quest connex n'han ils arguments da las aderentas e dals aderents betg savì persvader en la dimensiun necessaria. La decisiun dal pievel è natiralmain d'acceptar senza resalvas.

Questa decisiun na signifitga ussa però betg che las stentas da refurma da la regenza e dal parlament chalian. La regenza vegn ad examinar, sche alternativas tar il project refusà èn pussaivlas e co che quellas pudessan eventualmain vegnir messas danovamain en discussiun. En questa examinaziun vegnan oravant tut er integrads ils arguments da las adversarias e dals adversaris en il cumbat da votaziun. La NGF n'è dentant betg l'unic champ da refurma. I sa tracta da prender per mauns engaschadamain projects da refurma impurtants sco la legislaziun davart las scolas popularas dal chantun Grischun ed en spezial l'examinaziun e la nova concepziun da las structuras territorialas.

La populaziun vegn segir ad avair chapientscha ch'i na sa laschan betg gia preschentar novs plans da refurma definitivs oz suentermezdi. I tutga tar il respect da decisiuns dal pievel che la regenza na vul betg far a la bahuta annunzias e empermischuns il di da votaziun. La voluntad da la regenza da concepir il futur e l'engaschament da proponer las dretgas soluziuns per quai èn però en mintga cas ferms sco adina. La regenza vegn ad infurmar il parlament e la publicitad uschè spert sco pussaivel davart l'ulteriur proceder.

Infurmaziuns:
cusseglier guvernativ Martin Schmid, schef dal departament da finanzas e vischnancas, tel. 081 257 32 01 (cuntanschibel a partir da las 16.00)


Gremi: regenza
Funtauna: rg chanzlia chantunala dal Grischun
Neuer Artikel