Cuntegn da la pagina

Las missivas tar la revisiun da la lescha davart l'assicuranza d'edifizis e da la lescha davart l'indemnisaziun da donns elementars betg assicurabels sco er tar il relasch d'ina lescha davart la protecziun cunter incendis èn vegnidas deliberadas

  • Erste Mitteilung
  • Neuen Beitrag einfügen

En il chantun Grischun duain vegnir adattadas las disposiziuns giuridicas davart l'assicuranza d'edifizis, davart la protecziun cunter incendis sco er davart l'indemnisaziun da donns elementars betg assicurabels. La regenza grischuna ha deliberà las missivas correspundentas tar la revisiun da la lescha davart l'assicuranza d'edifizis, tar il relasch d'ina lescha davart la protecziun preventiva cunter incendis ed ils fatgs da pumpiers e tar la revisiun parziala da la lescha davart l'indemnisaziun da donns elementars betg assicurabels. Il cussegl grond vegn a tractar ils projects en la sessiun da zercladur.

La lescha davart l'assicuranza d'edifizis dal chantun Grischun (lescha davart l'assicuranza d'edifizis) dals 12 d'avrigl 1970 è sa cumprovada areguard il cuntegn ed areguard la concepziun. En differents puncts datti tuttina anc in basegn d'agir. La proposta da revisiun da la regenza prevesa ina midada da la lescha en spezial en ils suandants secturs:

  • differentas disposiziuns ch'èn actualmain cuntegnidas en las disposiziuns executivas vegnan transferidas en la lescha davart l'assicuranza d'edifizis, e quai sin fundament da lur impurtanza. Per essenzialisar e per flexibilisar la legislaziun vegnan percunter stritgadas or da la lescha paucas disposiziuns main impurtantas;
  • las disposiziuns davart la relaziun d'assicuranza vegnan adattadas a las circumstanzas dals fatgs d'assicuranza ch'èn sa midadas;
  • las disposiziuns davart la prevenziun e davart il cumbat da donns da fieu vegnan transferidas – ensemen cun las disposiziuns essenzialas da l'ordinaziun dal cussegl grond davart la polizia da fieu – en la nova lescha davart la protecziun preventiva cunter incendis ed ils fatgs da pumpiers en il chantun Grischun;
  • per la pudair leger meglier vegn la lescha suttamessa ad ina revisiun totala formala.

Reuniun da las disposiziuns davart la polizia da fieu e davart ils pumpiers
En la nova lescha davart la protecziun cunter incendis proponida vegnan reunidas las disposiziuns davart la polizia da fieu e davart ils pumpiers ch'èn actualmain regladas en differents relaschs, sco en la lescha davart l'assicuranza d'edifizis, en l'ordinaziun davart la polizia da fieu ed en las disposiziuns executivas tar l'ordinaziun davart la polizia da fieu, uschenavant che quellas basegnan ina regulaziun sin il stgalim da la lescha pervia da lur impurtanza. En quest connex vegnan las cumpetenzas da las vischnancas e dal chantun respectivamain da l'assicuranza d'edifizis regladas en moda pli clera, mantegnend la repartiziun da las incumbensas vertenta. Da nov è la realisaziun d'occurrenzas cun periclitaziun speziala da persunas, d'animals, da chaussas u da l'ambient suttamessa a l'obligaziun da dumandar ina permissiun da la vischnanca.

La tariffa d'indemnisaziun da la cassa per donns elementars vegn augmentada
La terza missiva realisescha ina incumbensa dal cussegl grond concernent in augment da las prestaziuns da la cassa per donns elementars betg assicurabels da bains immobigliars. Tenor la proposta da la regenza duai la tariffa d'indemnisaziun maximala da la cassa per donns elementars vegnir auzada dad oz 50 a da nov 80 pertschient. Da nov vegnan las contribuziuns da la cassa per donns elementars ultra da quai pajadas independentamain da las prestaziuns dal fond svizzer per agid en cas da donns elementars betg assicurabels.

Tant tar las disposiziuns davart la cumissiun administrativa da l'assicuranza d'edifizis sco er tar quellas davart la cumissiun administrativa da la cassa per donns elementars vegnan plinavant realisads ils princips da corporate governance ch'èn vegnids fixads da la regenza per instituziuns da dretg public. Concretamain vul quai dir che commembras e commembers da la regenza na dastgan betg far part da la cumissiun administrativa, che la direcziun sto vegnir elegida da la cumissiun administrativa e che l'indemnisaziun da la cumissiun administrativa, che vegn fixada en moda autonoma, sto vegnir approvada da la regenza.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun

Neuer Artikel