L'uffizi forestal sa participescha ad in project da perscrutaziun davart il guaud grischun e la midada dal clima. La finamira dal project che vegn realisà en la Val dal Rain grischuna ed en la Tumleastga è quella da perscrutar ils effects da la midada dal clima ed en spezial da la setgira per il guaud.

A lunga vista vegn la stgaudada dal clima actuala ad avair consequenzas er per ils guauds da muntogna. Quant fermas e da tge gener che questas consequenzas, èn è difficil da giuditgar. Sco consequenza d'eveniments extrems sco setgira, chalur u laina terrada dal vent pon tuttenina bulieus, insects u auters organissems ch'ins percorscha strusch sut cundiziuns normalas attatgar e donnegiar bostgs.

Pervia da quai ha la regenza grischuna concludì l'onn passà da s'engaschar en in project da perscrutaziun davart ils effects da la midada dal clima per il guaud. Quest project vegn realisà da l'institut federal per la perscrutaziun da guaud, naiv e cuntrada (WSL) en la Val dal Rain grischuna ed en la Tumleastga. L'uffizi forestal dal Grischun ed ils manaschis forestals da las vischnancas, en las qualas i vegnan realisadas las lavurs, fan er part dal project. Il chantun Grischun sa participescha cun ina contribuziun da totalmain 240'000 francs vi dals custs per il project da perscrutaziun "GuGrC – il guaud grischun e la midada dal clima: retschertgas davart l'impurtanza da la setgira per la dinamica da creschientscha dals bostgs en il guaud". Questa contribuziun vegn repartida sin ils onns 2009 fin 2011.

En il fratemp èn vegnidas tschernidas las surfatschas per l'experiment e vegnidas fatgas las emprimas installaziuns. Indrizs pli gronds èn ussa vegnids fatgs ils dis passads: A quatter lieus en las vischnancas da Domat, da Tumein e da Panaduz vegnan preparadas surfatschas, nua ch'ins lascha prosperar scherms. Sin las surfatschas da test da ca. 30 x 30 meters vegnan montads tetgs da plievgia per mesirar, quant enavant che quantitads da precipitaziuns divergentas influenzeschan la prosperitad dals bostgets fitg giuvens.


Infurmaziuns:
- Reto Hefti, selvicultur chantunal, uffizi forestal dal Grischun, tel. 081 257 38 51
- Ueli Bühler, sectur "ecologia dal guaud" da l'uffizi forestal, tel. 081 257 38 57


Gremi: uffizi forestal
Funtauna: rg uffizi forestal