Cuntegn da la pagina

Ina delegaziun dal parlament da Sviz fa ina visita al cussegl grond dal Grischun

  • Erste Mitteilung
  • Neuen Beitrag einfügen
Ina delegaziun dal cussegl grond da Sviz fa mardi, ils 20 d'avrigl 2010, durant la sessiun d'avrigl, ina visita a las collegas ed als collegas dal Grischun a Cuira.

La delegaziun da Sviz che sa cumpona da set persunas vegn manada dal president dal cussegl grond Christoph Pfister e dal vicepresident dal cussegl grond Xaver Schuler. Els vegnan tranter auter accumpagnads da la dumbravuschs Annemarie Langenegger, da la suppleanta da dumbravuschs Karin Schwiter sco er da la commembra e dals commembers dal parlament Petra Gössi, Andreas Meyerhans e Patrick Notter.

Ils giasts dal chantun Sviz vegnan retschavids dal president dal cussegl grond Christian Rathgeb e da la vicepresidenta dal cussegl grond Christina Bucher-Brini. Da vart dal Grischun sa participeschan a l'inscunter plinavant ils presidents da las fracziuns. Il program prevesa d'assister l'avantmezdi a las tractativas currentas dal cussegl grond e da far il suentermezdi in tur guidà tras la citad veglia da Cuira e da visitar la catedrala. La visita serva en emprima lingia al barat d'experientschas sco er a la tgira da las relaziuns amicablas.


Infurmaziun per las medias:
A las 10.00 stattan il president dal cussegl grond da Sviz Christoph Pfister, il president dal cussegl grond dal Grischun Christian Ratheb sco er il vicepresident dal cussegl grond da Sviz Xaver Schuler e la vicepresidenta dal cussegl grond dal Grischun Christina Bucher-Brini a disposiziun per ina fotografia tar l'entrada da l'edifizi dal cussegl grond a Cuira.


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel