Cuntegn da la pagina

Communicaziun da la regenza dals 27 da matg 2010

  • Erste Mitteilung
  • Neuen Beitrag einfügen

La restricziun da la dispensaziun directa da medicaments tras la media u tras il medi duai puspè vegnir abolida en il chantun Grischun. En sia ultima sesida ha la regenza grischuna avert la consultaziun tar ina revisiun parziala correspundenta da la lescha da sanadad. Ultra da quai ha la regenza concludì d'augmentar las contribuziuns chantunalas a las organisaziuns linguisticas Lia rumantscha, Pro Grigioni italiano ed Uniun grischuna da las Gualsras e dals Gualsers.

La restricziun da la dispensaziun directa da medicaments tras la media u tras il medi duai vegnir abolida
La restricziun da la dispensaziun directa da medicaments tras la media u tras il medi duai puspè vegnir abolida en il chantun Grischun. La regenza grischuna ha deliberà per la consultaziun il sboz correspundent per ina revisiun parziala da la lescha da sanadad.
Tenor la restricziun da la dispensaziun directa che vala dapi l'onn 1984 dastgan medias e medis en il Grischun manar in'apoteca privata mo, sche la pratica sa chatta en ina vischnanca che n'ha betg in'apoteca publica. Las medias ed ils medis che n'han betg ina permissiun per manar in'apoteca privata èn mo autorisads da duvrar medicaments durant la consultaziun sco er da consegnar per mintga diagnosa l'unitad originala la pli pitschna d'in medicament. Questas restricziuns legalas duain ussa puspè vegnir stritgadas. Da l'autra vart prevesa il sboz da la lescha da deliberar las apotecas publicas da l'obligaziun da mantegnair di e notg in servetsch d'urgenza permanent per garantir il provediment da la populaziun cun medicaments.
Ina retschertga ch'è vegnida fatga dal departament da giustia, segirezza e sanadad ha mussà che las finamiras ch'èn vegnidas persequitadas cun introducir la restricziun n'èn betg vegnidas cuntanschidas. Cunter tuttas aspectativas èn vegnidas avertas en il Grischun mo paucas apotecas novas ordaifer ils centers. En quai che reguarda il provediment cun medicaments dependa la populaziun en grondas parts dal chantun anc adina da las medias e dals medis che pratitgeschan là.
La restricziun dal dretg da la dispensaziun directa tras la media u tras il medi ha chaschunà ch'il Grischun n'è – envers ils auters chantuns da la Svizra da l'ost – betg attractiv per avrir ina nova pratica u per surpigliar ina pratica existenta. L'aboliziun da la restricziun che vegn proponida ussa duai render il Grischun puspè pli attractiv per medias e per medis che pratitgeschan sin agen quint. Uschia vul il Grischun er far frunt a la mancanza da medias e da medis dal provediment medicinal da basa che sa manifestescha e garantir il provediment medicinal futur da la populaziun.
Ils documents da consultaziun pon ins consultar sin la pagina d'internet dal departament da giustia, segirezza e sanadad www.djsg.gr.ch sut la rubrica "temas/projects". La consultaziun dura fin ils 31 d'avust 2010.

Las organisaziuns linguisticas survegnan dapli contribuziuns chantunalas
Il chantun Grischun augmenta sias contribuziuns a las trais organisaziuns linguisticas Lia rumantscha, Pro Grigioni italiano ed a l'Uniun da las Gualsras e dals Gualsers dal Grischun. Quai ha concludì la regenza grischuna. Ella ha approvà in augment a temp limità da las contribuziuns chantunalas.
A la Lia rumantscha ed a la Pro Grigioni italiano vegnan concedidas a temp limità contribuziuns da gestiun supplementaras extraordinarias da mintgamai 60'000 francs per onn per ils onns 2011 e 2012. La Lia rumantscha survegn tras quai ina contribuziun annuala da totalmain 500'000 francs e la Pro Grigioni italiano ina contribuziun totala da 170'000 francs. Las contribuziuns per ils onns 2013 fin 2016 vegnan a stuair vegnir regladas en ina nova cunvegna da prestaziun. A chaschun d'ina nova cunvegna da prestaziun (2011-2014) vegn er la contribuziun annuala a l'Uniun da las Gualsras e dals Gualsers augmentada per 30'000 francs ad ina contribuziun totala da 155'000 francs.
La regenza motivescha quest augment cun la situaziun finanziala speziala da las organisaziuns linguisticas. Pervia da quai è ella sa declerada pronta – en il senn d'in act da bainvulientscha – d'aderir parzialmain als giavischs. Per motivs da princip, dentant er per ponderaziuns giuridicas n'è il chantun però betg en il cas da star bun per largias tar la finanziaziun da la confederaziun. Ultra da quai vegn la regenza a s'engaschar tar la confederaziun, per ch'ils agids finanzials federals che sa basan sin ina lescha na vegnian betg bloccads per onns.

Infurmaziuns:
cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01


Da vischnancas e da regiuns

  • Differentas vischnancas: La regenza approvescha il project "Reparaziun d'averturas 2010", in project collectiv da differentas vischnancas. Tras il project duain vegnir reparadas diversas vias da guaud. Als custs da totalmain 85 objects da reparaziun vegnan garantidas contribuziuns da maximalmain 9'849'000 francs.
  • Filisur: A la vischnanca da Filisur vegn garantida e deliberada ina contribuziun da 61'740 francs per la 1. etappa da la renovaziun dal provediment d'aua.
  • Schiers: Al consorzi d'aua Schuders da la vischnanca da Schiers vegn garantida ina contribuziun da 146'160 francs per engrondir il provediment d'aua.
  • Molinis: La revisiun parziala da la planisaziun locala da la vischnanca da Molinis dals 25 da settember 2008 vegn approvada.
  • Seglias: La revisiun parziala da la planisaziun locala "zona d'explotaziun Campi" ch'è vegnida concludida ils 14 da settember 2009 da la vischnanca da Seglias vegn approvada.

Contribuziuns chantunalas a differentas instituziuns

  • Finanz Infra SA, Laax: Cun resalva da la finanziaziun totala reglada vegn concedì – en il rom da la nova politica regiunala da la confederaziun (NPR) – in credit dad 1'280'000 francs a la Finanz Infra SA, Laax, per construir l'indriz d'ennavar Grauberg Flem. Ultra da quai vegn garantida ina contribuziun chantunala da 215'475 francs.

Projects da vias
La regenza ha approvà totalmain 3'463'000 francs per construir e per sanar ils suandants trajects da vias:
- via da Breil: lavurs d'impressari Dardin – Breil
- via d'Engiadina: lavurs da cuvrida tar l'access da Scuol ost
- via sursilvana: correcziun da la via Trin-Mulin – Felsbach


Gremi: regenza
Funtauna: rg chanzlia chantunala dal Grischun

Neuer Artikel