En il Grischun han 16 bibliotecaras terminà dacurt lur furmaziun supplementara e survegnì il certificat da la cuminanza da lavur da las bibliotecas svizras da lectura publica (CLP).

En las passa 50 bibliotecas da scola e bibliotecas communalas dal chantun vegn prestada ina lavur da biblioteca cumpetenta, e quai cun il sustegn da la biblioteca chantunala dal Grischun. En la biblioteca chantunala dal Grischun vegnan purschidas regularmain furmaziuns supplementaras correspundentas per persunas creschidas. Questas furmaziuns supplementaras adempleschan las prescripziuns da qualitad da las directivas vertentas da la cuminanza da lavur da las bibliotecas svizras da lectura publica (CLP). Ils curs vegnan organisads – en num da la cumissiun da bibliotecas dal chantun Grischun – da l'incumbensada chantunala da las bibliotecas Nelly Däscher. Il curs fundamental da la CLP terminescha suenter 27 dis d'instrucziun cun in examen.

Dacurt han 16 absolventas survegnì il certificat da la CLP a chaschun da la festa da finiziun. En ses pled ha la manadra da l'uffizi da cultura, Barbara Gabrielli, gratulà a las bibliotecaras da la CLP e las ludà per lur engaschament. Plinavant ha ella menziunà ch'ellas possian ussa integrar las enconuschientschas en lur bibliotecas ch'èn instituziuns communalas da basa. I valia la paina da nizzegiar sinergias, da sa preschentar communablamain e da furmar ina rait ensemen cun las autras bibliotecas grischunas. Las purschidas ed ils servetschs da las singulas bibliotecas possian uschia vegnir accordads in cun l'auter en moda optimala.

In certificat han survegnì:
Monika Erhart, Maiavilla; Barbara Frehner, Son Gagl; Elisabeth Gehrig, Tavau Plaz; Paula Giger-Barandun, Grüsch; Anna Giudicetti Rizzi, Soazza; Ruth Grünenfelder Flury, Scuol; Odette Hartmann, Zizers; Cornelia Immoos, Pfäffikon; Heidi Müller, Nossadunnaun; Lilli Reber, Arosa; Carita Riesen, Arosa; Christa Schulthess, Ebnat-Kappel; Gina Schutz-Jenal, Filisur; Annina Spirig, Son Gagl; Julia Waldhauser, Schmerikon; Lotti Weber, Tavau Wolfgang


Infurmaziun per las medias:
Ina fotografia da las absolventas po vegnir retratga tar la biblioteca chantunala, Nelly Däscher: tel. 081 257 28 37, e-mail: Nelly.Daescher@kbg.gr.ch  


Gremi: biblioteca chantunala dal Grischun
Funtauna: rg biblioteca chantunala dal Grischun