Navigation

Inhaltsbereich

  • Erste Mitteilung
  • Neuen Beitrag einfügen
La cumissiun dal cussegl grond per politica da stadi e strategia ha predeliberà il sboz da lescha da la regenza davart ils registers d'abitantas e d'abitants. Ella suonda en tut ils puncts las propostas da la regenza e propona al cussegl grond d'approvar il project. Il parlament vegn a tractar il project en la sessiun da zercladur.

Sut il presidi dal president da la cumissiun Jon Domenic Parolini ha la cumissiun per politica da stadi e strategia predeliberà il sboz da la regenza davart la lescha davart ils registers d'abitantas e d'abitants per mauns dal cussegl grond. A la sesida che ha gì lieu a Scuol è er sa participà il cusseglier guvernativ Hansjörg Trachsel.

Sin fundament da la legislaziun federala surordinada ston ils chantuns e las vischnancas armonisar ils registers d'abitantas e d'abitants sco er ulteriurs registers uffizials. Per quest intent sto er il chantun Grischun relaschar ina legislaziun executiva. L'armonisaziun dals registers ha la finamira d'unifitgar ils registers d'abitantas e d'abitants en ils chantuns ed en las vischnancas sco er ils gronds registers da persunas da la confederaziun en il sectur dal stadi civil, da las persunas estras sco er da las fugitivas e dals fugitivs. Ils differents registers vegnan midads uschia, ch'els pon vegnir cumparegliads areguard il cuntegn, areguard la nomenclatura ed areguard l'actualitad e ch'els pon vegnir preparads per la transmissiun electronica standardisada da las datas. Questa retschertga sin basa dals registers duai en spezial remplazzar il vegl sistem da la dumbraziun dal pievel. A partir da l'onn 2010 vegnan las datas rimnadas per mintga quartal directamain dals differents registers. Sin basa dals registers armonisads e sin basa da la transmissiun periodica da las datas po l'uffizi federal da statistica metter a disposiziun permanentamain basas statisticas actualas. Ultra da quai porta l'armonisaziun er anc auters avantatgs a la confederaziun, als chantuns ed a las vischnancas.

Suenter avair discutà detagliadamain il project ha la cumissiun suandà las propostas da la regenza e propona al cussegl grond d'approvar il project.


Infurmaziuns:
Jon Domenic Parolini, president da la cumissiun per politica da stadi e strategia, tel. 079 280 72 92


Gremi: cumissiun per politica da stadi e strategia
Funtauna: rg cumissiun per politica da stadi e strategia
Neuer Artikel