La promoziun da la cultura dal chantun Grischun ha lantschà l'onn passà ina concurrenza per sviluppar projects e per promover scenaris da films documentars e da films dramatics rumantschs. Il cumenzament da zercladur èn vegnidas surdadas per la segunda giada contribuziuns ad ovras. Per trais projects da film èn vegnids concedids tut en tut 47'000 francs.
Da la fin d'avrigl fin la fin da matg han la commembra ed ils commembers da la cumissiun gì l'occasiun da giuditgar ils sis projects inoltrads. La cumissiun da concurrenza – che consista dad Esther Krättli Jenny, commembra da la cumissiun per promover la cultura, da Peter Egloff, publicist ed anteriur manader da program da la televisiun rumantscha, sco er dad Armon Fontana, uffizi da cultura, partiziun "promoziun da la cultura" – ha examinà la qualitad, la professiunalitad e l'autenticitad dals projects ch'èn vegnids inoltrads da las cineastas e dals cineasts.
Durant la fasa da pilot dals onns 2009 e 2010 mettan l'uffizi federal da cultura, secziun "film", e l'uffizi da cultura dal chantun Grischun, partiziun "promoziun da la cultura", a disposiziun mintg'onn daners da promoziun. Quest onn èn vegnids concedids tut en tut 47'000 francs per ils suandants projects da film:
• Hercli Bundi, 1964
Rumantsch – Generaziun 3.0, film documentar
• Carla Hitz, 1974
La Pulanera, film da dissegns animads
• Menga Huonder-Jenny, 1965
Unfànts a musica, film documentar
Project da pilot durant dus onns
Il project, ch'è per entant limità als onns 2009 e 2010, ha la finamira da meglierar las cundiziuns generalas per la cinematografia rumantscha. A medem temp è questa concurrenza da film ina contribuziun a la diversitad linguistica. La stad 2010 ha lieu – ensemen cun l'uffizi federal da cultura, secziun "film" – in'evaluaziun dal project da pilot. Suenter vegni decidì davart in'eventuala cuntinuaziun dal project.
Infurmaziuns:
Armon Fontana, promoziun da la cultura dal Grischun, tel. 081 254 16 02, e-mail:
armon.fontana@afk.gr.ch
Gremi: uffizi da cultura
Funtauna: rg uffizi da cultura