En sia ultima sesida ha la regenza constatà che l'iniziativa "Per ina politica d'energia persistenta" è reussida. Ultra da quai ha ella sbassà las limitas da CO2 per vehichels a motor che chaschunan paucas emissiuns.

L'iniziativa "Per ina politica d'energia persistenta" è reussida
L'iniziativa chantunala "Per ina politica d'energia persistenta" è reussida cun 3'194 suttascripziuns valaivlas. Quai ha constatà la regenza grischuna.
L'iniziativa legislativa, inoltrada ils 7 da fanadur 2010, è vegnida redigida en furma d'ina proposta generala e pretenda ch'il chantun redubleschia la quota d'energias regenerablas che derivan da lain/biomassa, da biogas, dal sulegl, dal vent e da la geotermia fin l'onn 2025 (onn da referenza: 2007). Questa pretensiun vala per l'energia finala che vegn duvrada sin il territori dal chantun.
En il rom dals conclus da princip da la regenza e resguardond ils termins legals vegn l'iniziativa surdada al departament da construcziun, traffic e selvicultura per l'ulteriura elavuraziun.

La regenza sbassa las limitas da CO2 per vehichels a motor che chaschunan paucas emissiuns
Per il 1. da schaner 2011 sbassa la regenza per l'emprima giada las limitas da CO2 che portan in rabat da la taglia sin vehichels a motor che chaschunan paucas emissiuns, e quai da 160 g/km a 140 g/km resp. da 140 g/km a 120 g/km. Motivadas vegnan las reducziuns cun il svilup tecnic cuntanschì sco er cun ils sforzs pli gronds dals constructurs d'automobils da sviluppar e da producir vehichels che chaschunan pli paucas emissiuns.
Tenor l'ordinaziun executiva actuala tar la lescha introductiva tar la lescha federala davart il traffic sin via vegn reducida la taglia da traffic per 60 pertschient per vehichels a motor levs cun in'emissiun da CO2 da maximalmain 160 g/km e per 80 pertschient per vehichels a motor levs cun in'emissiun da CO2 da maximalmain 140 g/km. La regenza ha ussa sbassà questas limitas. Las valurs pon vegnir adattadas mintga dus onns. Quai mintgamai sin basa dal svilup tecnic che vegn cuntanschì areguard las emissiuns d'autos da persunas levs.

Naginas votaziuns chantunalas ils 26 da settember 2010
La regenza grischuna ha prendì enconuschientscha dal fatg che la midada dals 19 da mars 2010 da la lescha federala davart l'assicuranza obligatorica cunter la dischoccupaziun e davart l'indemnisaziun per insolvenza (lescha davart l'assicuranza cunter la dischoccupaziun, LADI) vegn suttamessa al pievel dumengia, ils 26 da settember 2010, sco project da votaziun federal. Quest di na vegni votà davart nagins projects chantunals.

Da vischnancas e da regiuns

• Ardez: La regenza approvescha la revisiun da la lescha davart las taxas da cura da la vischnanca d'Ardez dals 29 da zercladur 2010.
• Bravuogn: La revisiun parziala da la constituziun da la vischnanca da Bravuogn, concludida ils 20 da matg 2010, vegn approvada.
• Bravuogn-Tavau: Il plan dal cunfin tranter las vischnancas da Bravuogn e da Tavau vegn approvà.
• Bravuogn-Samedan: Il plan dal cunfin tranter las vischnancas da Bravuogn e da Samedan vegn approvà.
• Bravuogn-Zuoz: Il plan dal cunfin tranter las vischnancas da Bravuogn e da Zuoz (enclava) vegn approvà.
• Bever: La lescha da construcziun, concludida ils 30 da november 2009, vegn approvada en il senn da las ponderaziuns.
• Beiva: Il project "Protecziun cunter lavinas Crap Milan" vegn approvà. Als custs subvenziunabels vegn garantida ina contribuziun da maximalmain 584'000 francs.
• Buseno: La regenza approvescha il project "Via forestala Palazi-Carnac" e conceda ina contribuziun da maximalmain 120'000 francs.
• Cuira: A la citad da Cuira vegn garantida ina contribuziun chantunala da construcziun da 363'190 francs per engrondir la chasa da scola superiura Quader.
• Tavau: Il project dal rempar dal Guggerbach vegn approvà cun cundiziuns e sustegnì cun maximalmain 356'500 francs.
• Tavau: La regenza approvescha cun cundiziuns il project dal rempar da l'aual da Dischma e conceda ina contribuziun da maximalmain 462'000 francs.
• Favugn: La revisiun parziala da la constituziun da la vischnanca da Favugn, concludida ils 13 da zercladur 2010, vegn approvada.
• Ftan-Tarasp: Il plan dal cunfin tranter las vischnancas da Ftan e da Tarasp vegn approvà.
• Igis: La regenza prenda enconuschientscha dal plan directiv communal "Energia" da la vischnanca dad Igis dals 31 da mars 2010.
• Malans: La revisiun parziala da la planisaziun locala dals 18 da favrer 2010 vegn approvada en il senn da las ponderaziuns.
• Scuol-Tarasp: Il plan dal cunfin tranter las vischnancas da Scuol e da Tarasp vegn approvà.

Contribuziuns chantunalas a differentas instituziuns

• Cuminanza d'interess parc da divertiment Sursaissa Mundaun: Cun resalva d'ina finanziaziun totala reglada vegn concedì a la cuminanza d'interess parc da divertiment Sursaissa Mundaun resp. a la Parc da divertiment Sursaissa Mundaun SA en fundaziun in emprest dad 1'540'000 francs en il rom da la nova politica regiunala da la confederaziun (NPR) per construir il parc da divertiment Sursaissa Mundaun. Ultra da quai vegn garantida ina contribuziun chantunala da 259'000 francs.

Projects da vias
La regenza ha approvà totalmain 5'886'000 francs per construir e per sanar ils suandants trajects da vias:
- via naziunala A28: sviament da Saas
- via naziunala A28: tunnel da Saas
- via da Furna a Boden
- via da la Lumnezia: Cumbel – Vella
- via da St. Antönien
- via da Schuders: Maria – Bazolis


Gremi: regenza
Funtauna: rg chanzlia chantunala dal Grischun