Cuntegn da la pagina

Communicaziun da la regenza dals 19 d'avust 2010

  • Erste Mitteilung
  • Neuen Beitrag einfügen

La regenza grischuna ha formulà sia posiziun davart la revisiun totala da la lescha federala davart la surveglianza dal traffic da posta e da telecommunicaziun.

La regenza beneventa la revisiun totala da la lescha federala davart la surveglianza dal traffic da posta e da telecommunicaziun
La regenza grischuna va da princip d'accord cun la revisiun totala previsa da la lescha federala davart la surveglianza dal traffic da posta e da telecommunicaziun. Sia posiziun sa basa sin las explicaziuns da la conferenza da las directuras e dals directurs chantunals da giustia e polizia (CDCGP). La regenza constatescha ch'il sboz è en general ina buna basa legala e ch'el mussa clers progress en cumparegliaziun cun il stadi actual.
La lescha federala regla la surveglianza dal traffic da posta e da telecommunicaziun, inclusiv quella dal traffic d'internet. La revisiun totala duai permetter da far las surveglianzas necessarias per pudair suandar il svilup da las novas tecnologias, sco particularmain quellas en il sectur da la telefonia d'internet. En emprima lingia duai vegnir meglierada la qualitad da la surveglianza. Areguard la protecziun da datas refusa la regenza percunter las novaziuns previsas, e quai en concordanza cun las explicaziuns da la CDCGP. Sia motivaziun è che la procedura penala cuntegnia suffizientamain prescripziuns davart la protecziun da las datas persunalas che pon vegnir eruidas en il rom d'ina procedura penala.

Da vischnancas e da regiuns

  • Samedan: La revisiun parziala da la planisaziun locala dals 25 da favrer 2010 vegn approvada.
  • Tinizong-Rona: La revisiun parziala da la planisaziun locala dals 17 da december 2009 vegn approvada en il senn da las ponderaziuns e cun correcturas.

 
Contribuziuns chantunalas a differentas instituziuns

  • Agid umanitar: Il chantun paja ina contribuziun da 23'000 francs a l'agid protestant svizzer (HEKS) a favur da l'acziun d'agid per las victimas da l'aua gronda en Pakistan.

Gremi: regenza
Funtauna: rg chanzlia chantunala dal Grischun

Neuer Artikel