La regenza grischuna ha inoltrà a la confederaziun il program per sustegnair chantuns plurilings per l'approvaziun. Ultra da quai ha la regenza concludì d'adattar las tariffas da las taxas per las permissiuns excepziunalas per la lavur da dumengia. La finala ha ella formulà sias posiziuns tar dus projects da la confederaziun.

Inoltrà a la confederaziun il program per sustegnair chantuns plurilings
Il chantun Grischun ha elavurà ses program per sustegnair ils chantuns plurilings tenor la lescha federala da linguas. La regenza grischuna ha approvà il program e l'inoltrà sco dumonda a la confederaziun. Per ademplir incumbensas spezialas dumonda il chantun da la confederaziun meds finanzials en l'autezza da 400'000 francs per onn per ils onns 2010 e 2011.
Per il 1. da schaner 2010 ha il cussegl federal mess en vigur la lescha da linguas. Tenor quella metta la confederaziun a disposiziun mintga onn meds finanzials en l'autezza da circa 1.5 milliuns francs per sustegnair ils chantuns plurilings Grischun, Berna, Vallais e Friburg. Quests meds finanzials vegnan deliberads supplementarmain a las ulteriuras contribuziuns per las linguas minoritaras naziunalas rumantsch e talian. Els servan però cumplainamain a cuvrir ils agens custs dal chantun e betg sco contribuziuns a terzas persunas.
Il chantun prevesa d'impunder ils meds finanzials federals supplementars per ina vasta paletta da mesiras en ils secturs da l'administraziun e da la furmaziun. Tranter auter èn planisads curs da lingua per las collavuraturas e per ils collavuraturs da l'administraziun chantunala sco er lavurs da terminologia tar il servetsch chantunal da translaziuns. Planisadas èn er mesiras spezialas sco curs da lingua e producziuns da meds d'instrucziun en ils secturs da la scola populara, dal gimnasi sco er da la scola professiunala.

Las taxas per las permissiuns excepziunalas per la lavur da dumengia vegnan adattadas
Il chantun Grischun adatta las tariffas da taxas per las permissiuns excepziunalas per la lavur da dumengia. Quai ha concludì la regenza grischuna e mess en vigur la revisiun parziala correspundenta da l'ordinaziun tar la lescha introductiva tar la lescha da lavur e tar la prevenziun d'accidents tenor la lescha davart l'assicuranza d'accidents per il 1. da settember 2010.
En quest connex vegnan auzadas las taxas maximalas per proceduras da permissiun per il temp da lavur e per disposiziuns che chaschunan blera lavur da 500 sin 3000 francs. Las tariffas da las taxas maximalas derivan anc da l'onns 2003. Il medem mument po il chantun dentant desister en il futur d'incassar ina taxa per permissiuns che chaschunan pauca lavur administrativa. A la regenza pari raschunaivel da tractar en moda facticamain eguala interpresas ch'èn obligadas da dumandar ina permissiun e talas che n'èn betg obligadas da dumandar ina permissiun e da desister d'incassar taxas minimalas.

La midada da l'ordinaziun davart la publicaziun dals pretschs vegn beneventada
La regenza grischuna beneventa per gronda part la midada da l'ordinaziun davart la publicaziun dals pretschs ch'è planisada da la confederaziun. Quella stgaffeschia dapli transparenza per las consumentas e per ils consuments, dettia dapli pais al princip dal tractament egual e chaschunia in'orientaziun pli gronda a la pratica. Quai menziunescha la regenza en sia resposta da consultaziun a la confederaziun.
Cun questas adattaziuns vul la confederaziun d'ina vart suttametter servetschs novs a l'obligaziun da publitgar ils pretschs. Da l'autra vart duain tschertas reglas ch'èn sa mussadas sco memia inflexiblas en la pratica puspè vegnir schluccadas. La regenza beneventa tranter auter ch'igl è planisà da laschar crudar l'obligaziun d'affischar ils pretschs en las stanzas d'hotel. Tenor ses avis vegn facilitada uschia l'adattaziun a la pratica actuala. Plinavant è la regenza da l'avis che ulteriuras midadas stgaffeschian dapli segirezza giuridica.

La revisiun da la lescha federala davart epidemias d'animals vegn approvada per part
La regenza grischuna beneventa da princip la revisiun planisada da la lescha federala davart epidemias d'animals. Uschia vegnian reglads sin il stgalim da la lescha ils giavischs per in cumbat modern d'epidemias d'animals ch'èn gia ditg giustifitgads e che tegnan quint da las relaziuns actualas. Sco che la regenza scriva en sia resposta da consultaziun stgaffescha la confederaziun – cun la revisiun qua avant maun – tranter auter la basa legala per che las autoritads possian far ina prevenziun efficazia da las epidemias d'animals.
La regenza propona però che la confederaziun stgaffeschia il medem mument sco la revisiun er la basa legala per ina banca da datas naziunala per chauns (analogamain a la regulaziun per la banca da datas davart il traffic d'animals). Ina soluziun unitara naziunala pudess meglierar fermamain la qualitad da las datas e reducir ils custs per ils chantuns. Plinavant po la regenza approvar il project d'in fond naziunal cunter epidemias d'animals mo sut la premissa che quest fond sustegnia il sistem federalistic cun ils instruments chantunals e n'al remplazzia betg. Pervia da quai stoppian ils champs d'incumbensas vegnir definids uschè bain sco pussaivel gia ordavant.

Da vischnancas e da regiuns

• Engiadina: La regenza conceda a l'Academia Engiadina la permissiun da manar ina scola media spezialisada cun ils champs professiunals "sanadad" e "pedagogia" a partir da l'onn da scola 2011/2012. Questa permissiun vegn dada provisoricamain e cun la resalva che la conferenza svizra da las directuras e dals directurs chantunals da l'educaziun publica renconuschia ils diploms respectivs.
• Cazas: La revisiun totala da la planisaziun locala, concludida da la vischnanca da Cazas ils 15 da december 2009, vegn approvada.
• Tumegl: La revisiun parziala da la planisaziun locala da la vischnanca da Tumegl, ch'era vegnida concludida ils 5 da mars 2010, vegn approvada.
• S. Martin: La revisiun totala da la planisaziun locala da la vischnanca da S. Martin, concludida ils 9 da december 2009, vegn approvada.
• Silvaplauna: La revisiun parziala da la planisaziun locala da la vischnanca da Silvaplauna, concludida ils 17 da favrer 2010, vegn approvada.
• Preaz: La revisiun totala da la planisaziun locala dals 12 da november 2009, concludida da la vischnanca da Preaz (dapi il 1. da schaner 2010 vischnanca da Cazas), vegn approvada.

 

Contribuziuns chantunalas a differentas instituziuns

• ARGO, fundaziun grischuna per lavuratoris e dimoras per persunas cun impediments: La dumonda ch'è vegnida inoltrada da l'ARGO, la fundaziun grischuna per lavuratoris e dimoras per persunas cun impediments, per construir in edifizi da scrinaria nov a Surava (lavuratori Casti) vegn approvada. A l'ARGO vegn garantida ina contribuziun da maximalmain 945'450 francs per construir quest edifizi da scrinaria.
• Chasa da burgaisas e da burgais, Cuira: Il project da construcziun per la midada da construcziun e per l'engrondiment da la chasa da burgaisas e da burgais a Cuira vegn approvà. A l'instituziun responsabla vegn garantida – cun resalva da la garanzia da la finanziaziun restanta – ina contribuziun chantunala maximala da 9'400'000 francs per metter a disposiziun 66 letgs da tgira.

Gremi: regenza
Funtauna: rg chanzlia chantunala dal Grischun