Navigation

Inhaltsbereich

  • Erste Mitteilung
  • Neuen Beitrag einfügen
Il provediment cun internet a bindel lad tar l'infrastructura da telecommunicaziun dastga vegnir giuditgà sco bun en il chantun Grischun. El correspunda pli u main a la media svizra. Questa conclusiun tira in rapport, dal qual la regenza ha prendì enconuschientscha. La regenza vul persequitar vinavant en moda activa il svilup dinamic en quest sectur. En quest connex envida ella la confederaziun da garantir il provediment cun internet a bindel lad en il rom dal servetsch public. Er duain las vischnancas daventar activas sin lur territori.

Ina infrastructura da telecommunicaziun moderna che tegna quint dals basegns da la populaziun e da l'economia è da gronda impurtanza per il chantun. In nov rapport, ch'il departament d'economia publica e fatgs socials ha incità, dat ussa ina survista davart la situaziun dal provediment cun internet a bindel lad en il Grischun. Il rapport vegn a la conclusiun, ch'il chantun haja in bun access cun fibras da vaider en la zona a distanza.

Ina rait fitg spessa sa derasa sur l'entir chantun per lung dals trassés da las differentas proprietarias e dals differents proprietaris da conducts da fibras da vaider, sco per exempel gestiunarias e gestiunaris da raits da telecommunicaziun e da cabel sco er interpresas dal provediment d'energia ed interpresas da viafier. En vista ad in eventual access da chasadas e d'interpresas a fibras da vaider stat a disposiziun en il Grischun ina infrastructura da la zona a distanza bain sviluppada che po vegnir amplifitgada senza difficultads. Er il provediment da las chasadas cun internet a bindel lad sur il cabel da telefon d'arom (DSL) è circa tuttina bun sco en la media svizra. 99 pertschient da las abitantas e dals abitants pon abunar in servetsch cun almain 4 MBit/s, quai che correspunda circa a las sveltezzas da transferiment da datas che persunas privatas dovran actualmain en media. Il provediment da las plazzas da lavur cun internet a bindel lad è meglier che quel da las chasadas.

La confederaziun duai garantir il servetsch public er tar il provediment cun internet a bindel lad
La situaziun en quest sectur sa mida dentant svelt. Perquai vul la regenza persequitar vinavant la situaziun en moda activa. Il cussegl federal vegn a preschentar proximamain al parlament in rapport davart il svilup dal martgà svizzer da telecommunicaziun. La regenza pretenda dal cussegl federal ch'el adempleschia sias obligaziuns en connex cun il provediment cun internet a bindel lad en il rom dal servetsch public e ch'el fetschia las midadas da la lescha ch'èn necessarias.

Er vul il chantun integrar las vischnancas ed orientar davart las enconuschientschas dal rapport. Ellas duain daventar activas sin lur territori. Las vischnancas pon accelerar l'amplificaziun da la rait da l'internet a bindel lad, contactond differentas purschidras e differents purschiders per uschia lantschar projects per megliers access. Ultra da quai duain vegnir resguardadas las pretensiuns per la futura infrastructura da fibras da vaider er tar las lavurs da construcziun bassa. La finala vul la regenza procurar ch'i vegnia installà in barat d'infurmaziuns activ e regular tranter las differentas acturas ed ils differents acturs, sco las firmas da telecommunicaziun, las gestiunarias ed ils gestiunaris da raits da cabel e las interpresas d'electricitad.

Il rapport da l'uffizi per il svilup dal territori vegn publitgà en l'internet sut www.are.gr.ch.


Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01
- Boris Spycher, manader da project tar l'uffizi per il svilup dal territori, tel. 081 257 23 06


Gremi: regenza
Funtauna: rg chanzlia chantunala dal Grischun
Neuer Artikel