Navigaziun principala

Cuntegn da la pagina

Communicaziun da la regenza dals 16 da settember 2010

  • Erste Mitteilung
  • Neuen Beitrag einfügen

La regenza grischuna ha concludì da laschar elavurar in sboz per ina nova lescha per promover las scolas autas e la perscrutaziun. Tras quella duai vegnir rinforzà il Grischun sco lieu da perscrutaziun. Ultra da quai ha la regenza fixà las contribuziuns per purschidas da la tgira d'uffants cumplementara a la famiglia per l'onn che vegn. La finala ha ella formulà la posiziun ch'ella inoltrescha a la confederaziun en connex cun l'audiziun da las midadas da l'ordinaziun davart la protecziun e davart l'utilisaziun da las auas.

La regenza dat glisch verda per preparar ina lescha per promover las scolas autas e la perscrutaziun
Per rinforzar il Grischun sco lieu da perscrutaziun vul il chantun elavurar ina nova lescha per promover las scolas autas e la perscrutaziun. Quai ha concludì la regenza grischuna, dond la direcziun per las lavurs preparatoricas.
Il cussegl grond aveva acceptà ina intervenziun per stgaffir ina lescha per promover las scolas autas e la perscrutaziun en la sessiun da favrer 2008. Per avair ina basa adattada ha il cussegl grond dà l'incumbensa da far in rapport. Quel duai preschentar propostas politicamain realisablas per il profil e per la concepziun da la politica grischuna da scola auta e da perscrutaziun. La regenza ha ussa prendì enconuschientscha dal rapport "Il Grischun sco chantun da scolas autas e da perscrutaziun" da dr. Stephan Bieri. Il medem mument ha ella installà ina gruppa directiva da project che ha da preparar il sboz d'ina lescha. La consultaziun latiers duai vegnir lantschada la primavaira 2011.
Entant che las furmas giuridicas existentas da las scolas autas grischunas na duain betg vegnir midadas, ston vegnir stgaffidas structuras adattadas per la promoziun statala dal sectur da la perscrutaziun. Tenor l'avis da la regenza è en spezial la colliaziun interchantunala d'ina impurtanza centrala per las scolas autas e per ils instituts da perscrutaziun en il Grischun per pudair profitar adequatamain dals svilups naziunals. Cun lavurar vinavant vi dal project sto pervia da quai vegnir dada in'attenziun speziala a la cooperaziun interchantunala.

Fixà las contribuziuns per purschidas da la tgira d'uffants cumplementara a la famiglia per l'onn 2011
La regenza grischuna ha fixà da nov ils custs normads per las purschidas da la tgira d'uffants cumplementara a la famiglia cun dretg da survegnir contribuziuns. Per l'onn 2011 importan quels 9.20 francs per ura da tgira e per uffant. Per purschidas novas vegn la tariffa da contribuziun dal chantun fixada sco fin ussa a 25 pertschient dals custs normads per ils emprims trais onns. Per tut las ulteriuras purschidas vegn questa tariffa fixada a 20 pertschient dals custs normads. La tariffa da contribuziun pli auta da 25 pertschient vala l'onn 2011 per 9 novas canortas d'uffants u maisas da mezdi.
La tariffa dals custs normads da 9.20 francs per l'onn 2011 è 0.15 francs pli auta che l'onn 2010. Tut en tut ha il chantun budgetà l'onn 2011 ina contribuziun da 2'205'500 francs per las purschidas da la tgira d'uffants cumplementara a la famiglia. En il Grischun han totalmain 502 plazzas d'in entir onn il dretg da survegnir contribuziuns.

La confederaziun duai elavurar anc ina giada l'adattaziun d'ordinaziuns davart la protecziun e davart l'utilisaziun da las auas
La regenza grischuna n'è betg perencletga cun las midadas da differentas ordinaziuns davart la protecziun e davart l'utilisaziun da las auas ch'èn vegnidas proponidas da la confederaziun. Las propostas da revisiun sa mussian tut en tut sco betg gartegiadas e basegnian ina correctura generala. Quai menziunescha la regenza en sia audiziun a la confederaziun.
Las chombras federalas han concludì il december 2009 da midar differentas leschas federalas sco cuntraproject indirect tar l'iniziativa dal pievel "Aua viva". Correspundentamain ston er vegnir adattadas las ordinaziuns necessarias. Quai pertutga en spezial las ordinaziuns davart la protecziun da las auas, davart la correcziun dals curs d'aua, davart l'energia e davart la pestga.
Sco che la regenza menziunescha vinavant en l'audiziun, tutgan tscherts secturs da las revisiuns proponidas a la cumpetenza dals chantuns. En quest connex è la tenuta da la confederaziun caracterisada autamain d'ina disfidanza envers ils chantuns. Uschia duain ils chantuns vegnir "tegnids veritablamain a mastrin" da la confederaziun tar la planisaziun da las mesiras per revitalisar e per sanar undadas e sbassaments, dentant er per meglierar las relaziuns per ils peschs. Ina controlla che vegn dictada en questa maniera da surengiu n'han ils chantuns betg da basegn, perquai ch'els èn sezs en cas da realisar eventualas mesiras sco ch'i sto esser. Er refusa la regenza ils termins da realisaziun ambizius che sa demussan sco betg realistics per chantuns che han bleras ovras d'accumulaziun respectivamain flums cun bleras parts curregidas.

Da vischnancas e da regiuns 

  • Grischun dal nord: Il plan directiv regiunal "Traffic betg motorisà da la subregiun da la Val dal Rain grischuna", ch'è vegnì concludì da la corporaziun regiunala dal Grischun dal nord ils 30 da mars 2010, vegn approvà.
  • Bregaglia: La revisiun parziala da la planisaziun locala che l'anteriura vischnanca da Soglio (dapi il 1. da schaner 2010 vischnanca da Bregaglia) ha concludì ils 27 da november 2009 vegn approvada.
  • Breil: La revisiun parziala da la planisaziun locala da la vischnanca da Breil, ch'è vegnida concludida ils 3 da matg 2010, vegn approvada.
  • Schiers: Per la fusiun dal provediment d'aua da Schiers cun il provediment d'aua da Vorder-/Mittellunden vegn garantida a la vischnanca da Schiers ina contribuziun pauschala da 67'500 francs.

 

Gremi: regenza
Funtauna: rg chanzlia chantunala dal Grischun

Neuer Artikel