Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per ambient, traffic ed energia ha predeliberà la missiva tar la lescha davart la protecziun da la natira e da la patria per la sessiun d'october 2010. La cumissiun propona al cussegl grond d'approvar il project cun intginas midadas.

En dus dis da sesida sut il presidi dal deputà Simi Valär sco er en preschientscha dal president da la regenza Claudio Lardi ha la cumissiun per ambient, traffic ed energia predeliberà il sboz da la lescha davart la protecziun da la natira e da la patria en il chantun Grischun (lescha chantunala davart la protecziun da la natira e da la patria, LNPGR) ed ha deliberà quel per mauns dal cussegl grond.

Tenor l'avis da la cumissiun datti plirs motivs per ina reorganisaziun totala dal dretg chantunal davart la protecziun da la natira e da la patria: Las disposiziuns chantunalas davart la protecziun da la natira e da la patria èn per part antiquadas, èn incumpletas, èn sparpagliadas e n'adempleschan betg pli las pretensiuns dal dretg federal. L'ordinaziun dal cussegl grond davart la protecziun da la natira e da la patria datescha da l'onn 1946, la lescha per promover la protecziun da la natira e da la patria da l'onn 1965. Er la lescha davart la protecziun da las plantas e dals bulieus da l'onn 1975 è antiquada. Il basegn d'adattar ils relaschs exista objectivamain ed è cumprovà. Ina reorganisaziun totala dal dretg chantunal davart la protecziun da la natira e da la patria en in unic relasch sin il stgalim d'ina lescha è necessaria ed inditgada tenor l'avis da la cumissiun. Suenter ina debatta d'entrada detagliada e per part er accumpagnada da votums critics ha la cumissiun decidì en quest senn unanimamain d'entrar en il project.

Cun las finamiras e cun las prioritads dal project va la cumissiun per gronda part d'accord. La tractativa detagliada dal project ha purtà intginas propostas da midada da la cumissiun generala. La regenza ha pli tard dentant er pudì acceptar questas midadas. Sulettamain pertutgant il sectur dals effects da la protecziun – nua ch'i sa tracta d'obligar las proprietarias ed ils proprietaris d'in object ch'è mess sut protecziun da mantegnair e da prender mesiras da protecziun cunter il donn e la perdita da lur object, schebain mo limitadamain grazia al supplement "uschenavant che quai è raschunaivel" – ha ina minoritad da la cumissiun pretendì da stritgar senza cumpensaziun la disposiziun respectiva.

Suenter ina debatta detagliada ed intensiva ha la cumissiun concludì unanimamain da recumandar al cussegl grond d'approvar il relasch da la lescha chantunala davart la protecziun da la natira e da la patria.


Infurmaziuns:
Simi Valär, president da la cumissiun per ambient, traffic ed energia, tel. 076 503 70 76


Gremi: cumissiun per ambient, traffic ed energia
Funtauna: rg cumissiun per ambient, traffic ed energia
Neuer Artikel