Navigaziun principala

Cuntegn da la pagina

Communicaziun da la regenza dals 14 d'october 2010

  • Erste Mitteilung
  • Neuen Beitrag einfügen

La regenza ha avert la consultaziun davart la nova finanziaziun dals ospitals. Per l'onn 2012 sto quella vegnir adattada a las directivas da la confederaziun. Ultra da quai ha la regenza concludì da renunziar per entant a l'aboliziun da la restricziun proponida da la dispensaziun directa da medicaments tras la media u tras il medi. Dal rest ha ella mess en vigur la nova lescha d'energia per il 1. da schaner 2011 e deliberà la nova planisaziun generala da las chasas da tgira 2010. La finala ha la regenza decidì ch'i na dettia nagina votaziun davart projects chantunals ils 28 da november sco er formulà sia posiziun tar ina consultaziun federala.

Avert la consultaziun davart la nova finanziaziun dals ospitals
La finanziaziun dals ospitals sto vegnir reglada da nov ed adattada per l'onn 2012 a las directivas da la confederaziun. La regenza grischuna ha deliberà la consultaziun correspundenta tar la revisiun parziala da la lescha per promover la tgira da persunas malsaunas.
A partir da l'onn 2012 duai l'indemnisaziun dals tractaments medicinals en ils ospitals sa basar da nov sin las uschenumnadas DRG (Diagnosis Related Groups), vul dir sin pretschs pauschals pro cas che sa drizzan tenor la prestaziun. La finamira è quella da promover la rentabilitad e la concurrenza da qualitad.
Ina midada essenziala da la nova finanziaziun dals ospitals è ch'ils custs d'investiziun èn cuntegnids en il futur en las pauschalas pro cas. Quai vul dir ch'ils ospitals ston finanziar sezs las investiziuns or dals retgavs currents a partir da l'onn 2012. Ultra da quai ston ils chantuns er sa participar – en il senn d'in tractament egual dals ospitals publics e dals ospitals privats – als custs d'in tractament staziunar en in ospital privat, sche quel sa chatta sin ina glista d'ospitals. Viceversa pon las pazientas ed ils pazients tscherner libramain in dals ospitals che figurescha sin ina glista d'ospitals.
In'ulteriura novaziun è quella ch'il maun public sto surpigliar en l'avegnir almain 55 pertschient da las pauschalas che vegnan fixadas tranter ils ospitals e las assicuranzas da malsauns. La realisaziun en il chantun Grischun prevesa ch'il chantun surpiglia 87 pertschient e che las vischnancas surpiglian 13 pertschient da las contribuziuns dal maun public als ospitals. Uschia vegnan ils custs supplementars dal maun public repartids sin il chantun e sin las vischnancas confurm a la media da la finanziaziun actuala da las contribuziuns d'investiziun e da las contribuziuns da gestiun.
Ils documents da la consultaziun tar la midada da la finanziaziun dals ospitals stattan a disposiziun sin la pagina d'internet dal departament da giustia, segirezza e sanadad www.djsg.gr.ch. La consultaziun dura fin ils 31 da december 2010.

Renunzia provisorica a l'aboliziun da la restricziun da la dispensaziun directa da medicaments tras la media u tras il medi
La regenza grischuna renunzia per entant d'abolir puspè la restricziun da la dispensaziun directa da medicaments tras la media u tras il medi ch'exista en il Grischun. Ella ha prendì enconuschientscha da l'evaluaziun da la consultaziun correspundenta tar il sboz d'ina revisiun parziala da la lescha da sanadad.
Sin basa da l'evaluaziun da las respostas da la consultaziun ston ins partir dal fatg che l'aboliziun da la restricziun da la dispensaziun directa da medicaments tras la media u tras il medi ch'è vegnida messa en discussiun na vegnia betg sustegnida d'ina maioritad. Fin che la regulaziun futura da la lescha federala è clera, renunzia la regenza per entant d'elavurar in project da revisiun correspundent per mauns dal cussegl grond.
En la consultaziun che ha durà fin la fin d'avust 2010 ha la regenza proponì d'abolir puspè la restricziun da la dispensaziun directa da medicaments tras la media u tras il medi ch'è vegnida introducida l'onn 1984 en il Grischun. Il motiv è stà il fatg che la dispensaziun directa da medicaments è permessa en general a las medias ed als medis dals auters chantuns da la Svizra orientala. L'aboliziun duess puspè render il Grischun pli attractiv per medias e per medis che pratitgeschan sin agen quint.
La regulaziun vertenta prescriva che medias e medis en il Grischun dastgan manar in'apoteca privata mo, sche la pratica sa chatta en ina vischnanca che n'ha betg in'apoteca publica. Las medias ed ils medis che n'han betg ina permissiun per manar in'apoteca privata èn mo autorisads da duvrar medicaments durant la consultaziun sco er da consegnar per mintga diagnosa l'unitad originala la pli pitschna d'in medicament.

La nova lescha d'energia entra en vigur il cumenzament da l'onn 2011
La regenza grischuna ha mess en vigur per il 1. da schaner 2011 la lescha d'energia dal chantun Grischun ch'è vegnida revedida totalmain e l'ordinaziun correspundenta. Il cussegl grond aveva approvà la revisiun totala ils 20 d'avrigl 2010 ed il termin da referendum è scadì ils 28 da fanadur 2010 senza ch'i saja vegnì fatg in referendum.
Cun questa lescha vul il chantun Grischun reducir en moda persistenta il consum d'energias fossilas e promover pli fitg la midada vi sin energias regenerablas. Questa lescha prevesa da cuntanscher las finamiras en spezial cun reducir en etappas il basegn d'energia termica maximalmain admissibel tar edifizis. Per cuntanscher quai vegnan er augmentadas las contribuziuns da promoziun.

Deliberà la nova planisaziun generala chantunala da las chasas da tgira
La regenza grischuna ha deliberà l'uschenumnada "planisaziun generala da las chasas da tgira 2010" per la tgira e per l'assistenza staziunara e parzialmain staziunara da persunas attempadas en il chantun. Cun quella vegn actualisada la planisaziun generala vertenta da l'onn 2004 en il senn d'ina planisaziun successiva.
En la planisaziun generala chantunala da las chasas da tgira vegn calculà per mintgina da las 19 regiuns da planisaziun il basegn da letgs teoretic futur fin l'onn 2025. La planisaziun generala serva er sco basa per conceder contribuziuns d'investiziun a novs letgs da tgira sco er per la glista chantunala da las chasas da tgira. Las calculaziuns dal basegn mussan ch'igl exista in basegn teoretic supplementar da letgs da tgira en 12 regiuns da planisaziun ed in surpli da letgs en 2 regiuns. En las ulteriuras 5 regiuns correspunda il basegn circa a la disponibladad actuala da letgs. La valur directiva dal basegn da letgs da la populaziun che ha 80 onns e dapli d'actualmain 25 pertschient vegn fixada fin l'onn 2025 a maximalmain 22 pertschient. La reducziun dal basegn supplementar da letgs da tgira che resulta da quai po dentant mo vegnir cuntanschida, sch'i vegnan messas a disposiziun avunda purschidas en il sectur ambulant. La proxima planisaziun chantunala generala duai vegnir suttamessa a la regenza l'onn 2015.

Nagins projects chantunals da votaziun ils 28 da november 2010
La regenza grischuna ha prendì enconuschientscha dal fatg che l'iniziativa dal pievel "per il repatriament da las persunas estras criminalas (iniziativa per il repatriament)" sco er il cuntraproject davart l'expulsiun e la spedida da persunas estras criminalas en il rom da la constituziun federala e l'iniziativa dal pievel "Per taglias gistas. Fin cun l'abus en la concurrenza fiscala (iniziativa per taglias gistas)" vegnan suttamess sco projects federals a la votaziun dal pievel da dumengia, ils 28 da november 2010. Quest di na vegni votà davart nagins projects chantunals.

La regenza vul mantegnair la taxaziun pauschala
La regenza grischuna beneventa il sboz da la lescha federala davart la taxaziun tenor las expensas. Ella sustegna l'augment da l'entrada minimala sin set giadas la valur da l'atgna locaziun u dal tschains da locaziun sco ch'el vegn proponì da la regenza.
Sco che la regenza scriva en sia resposta da consultaziun a la confederaziun vegn la taxaziun pauschala adina puspè crititgada sut l'aspect da l'egualitad giuridica ed i vegn pretendì ch'ella vegnia abolida. La regenza na va betg d'accord cun questa valitaziun. La taxaziun tenor las expensas è da gronda impurtanza per il chantun Grischun e sto vegnir mantegnida sur mort e fin. Pervia da quai sustegna la regenza las stentas da la confederaziun da cumbatter l'iniziativa dal chantun Son Gagl cun ina cuntraproposta. La consequenza da l'aboliziun da la taxaziun pauschala pudess esser che persunas ritgas pauschalisadas pudessan spustar lur domicil a l'exteriur.

Da vischnancas e da regiuns 

  • Roveredo: La revisiun parziala da la constituziun communala da la vischnanca da Roveredo, concludida da la radunanza communala ils 29 d'avust 2010, vegn approvada.
  • Tenna: A la vischnanca da Tenna vegn garantida ina contribuziun chantunala da construcziun da pauschalmain 423'000 francs per midar e per engrondir la chasa da scola.
  • Bravuogn: La revisiun parziala da la planisaziun locala, concludida da la vischnanca da Bravuogn ils 29 d'avrigl 2010, vegn approvada cun ina midada che concerna la situaziun da la garascha sutterrana da l'implant per embuttigliar aua minerala sco er cun prescripziuns per la planisaziun consecutiva en il sectur da la zona d'abitar e da mastergn prepostada.
  • Schlarigna: La revisiun parziala da la planisaziun locala da la vischnanca da Schlarigna, ch'è vegnida concludida ils 29 da mars 2010, vegn approvada.
  • Claustra-Serneus: La revisiun parziala da la planisaziun locala da la vischnanca da Claustra-Serneus dals 13 da zercladur 2010 vegn approvada.
  • Vaz: La revisiun parziala da la planisaziun locala da la vischnanca da Vaz, ch'è vegnida concludida ils 29 da november 2009, vegn approvada.

 

Contribuziuns chantunalas a differentas instituziuns

  • Fundaziun Pro Terra Engiadina: A la fundaziun "Pro Terra Engiadina" vegn garantida ina contribuziun chantunala da maximalmain 60'800 francs per elavurar la basa dal project per il svilup regiunal "Agricultura e turissem: inavant in cumünanza". Quai cun resalva che la confederaziun paja sia contribuziun garantida.
  • Club da bartgas a vela da San Murezzan: Per restaurar la chasa dal club survegn il club da bartgas a vela da San Murezzan ina contribuziun da maximalmain 26'000 francs or dal fond da sport.
  • Uniun Swiss O Week 2011 Flem-Laax: L'acquisiziun da chartas per la cursa d'orientaziun da l'uniun "Swiss O Week 2011 Flem-Laax" vegn sustegnida cun ina contribuziun da maximalmain 62'000 francs or dal fond da sport.

Gremi: regenza
Funtauna: rg chanzlia chantunala dal Grischun

Neuer Artikel