Cuntegn da la pagina

Communicaziun da la regenza dals 28 d'october 2010

  • Erste Mitteilung
  • Neuen Beitrag einfügen

La regenza grischuna ha concludì d'integrar il center per prevenziun e promoziun da la sanadad ZEPRA en l'uffizi chantunal da sanadad. Quai cun la finamira d'optimar vinavant l'adempliment da las incumbensas en quest sectur e d'impunder ils meds finanzials existents en moda pli economica. Dal rest ha la regenza mess en vigur differentas leschas chantunalas, tranter quellas la nova lescha davart ils registers d'abitantas e d'abitants, e formulà sias posiziuns davart proceduras da consultaziun da la confederaziun.

Il center per prevenziun e promoziun da la sanadad ZEPRA vegn integrà en l'uffizi chantunal da sanadad
Il center per prevenziun e promoziun da la sanadad ZEPRA en il chantun Grischun vegn integrà a partir da l'onn 2012 en l'uffizi da sanadad. Quai ha concludì la regenza grischuna, desdind per la fin da l'onn 2011 l'incarica da prestaziun ch'era vegnida surdada al chantun Son Gagl per manar il center. Questa integraziun ha la finamira d'optimar vinavant l'adempliment da las incumbensas en il sectur da la prevenziun che daventa pli e pli impurtanta sco er d'impunder ils meds finanzials existents en moda pli economica.
Dapi l'onn 2001 maina il chantun Son Gagl il center per prevenziun e promoziun da la sanadad ZEPRA en il chantun Grischun sin basa d'ina incarica da prestaziun. La purschida dal center domicilià a Cuira cumpiglia la promoziun da la sanadad e la prevenziun betg medicinala e psicosociala per la populaziun dal chantun Grischun. La contribuziun pauschala dal chantun importa circa 770'000 francs per onn.
Tant l'uffizi chantunal da sanadad sco er il center per prevenziun e promoziun da la sanadad ZEPRA adempleschan incumbensas en il sectur da la promoziun da la sanadad e da la prevenziun. Uschia stat il program chantunal cumplessiv "grischun en moviment" sut la direcziun da l'uffizi da sanadad. Cun transferir il center en l'uffizi da sanadad pon las mesiras dal provediment da la sanadad e da la prevenziun da la sanadad sco er la prevenziun medicinala e betg medicinala vegnir coordinadas meglier ina cun l'autra en l'avegnir. Er ils meds finanzials per la promoziun da la sanadad e per la prevenziun pon vegnir impundids en moda pli economica. Il center duai vegnir transferì per il 1. da schaner 2012 en la partiziun "promoziun da la sanadad e prevenziun" da l'uffizi da sanadad. La finamira è quella da mantegnair il know-how ch'il center è s'acquistà ils ultims 10 onns cun surpigliar – sche pussaivel – las collavuraturas ed ils collavuraturs dal ZEPRA Grischun.

Mess en vigur la nova lescha davart ils registers d'abitantas e d'abitants
La regenza grischuna ha mess en vigur per il 1. da december 2010 la nova lescha davart ils registers d'abitantas e d'abitants sco er l'ordinaziun correspundenta. Il cussegl grond aveva approvà la lescha en la sessiun da zercladur 2010. Ils 22 da settember 2010 è scadì il termin da referendum senza ch'i saja vegnì fatg in referendum.
Questa lescha regla l'execuziun da la lescha federala davart l'armonisaziun dals registers d'abitants e d'auters registers uffizials da persunas. En quest connex vegnan unifitgads ils registers en quai che reguarda il cuntegn, la nomenclatura e l'actualitad. A medem temp stgaffescha la lescha la basa per pussibilitar en l'avegnir ina transmissiun electronica standardisada da las datas. Quai porta avantatgs a la confederaziun, als chantuns ed a las vischnancas e permetta da lavurar en moda pli effizienta tras andaments simplifitgads en las administraziuns. A partir da l'onn 2010 n'ha la dumbraziun dal pievel numnadamain betg pli lieu sco pli baud mintga 10 onns cun agid da questiunaris sin palpiri. Empè da quai duai l'uffizi federal da statistica pudair utilisar directamain, quatter giadas per onn, las datas dals registers per far evaluaziuns statisticas sin via electronica.

Mess en vigur las adattaziuns da las leschas davart l'assicuranza d'edifizis, davart la protecziun cunter incendis e davart la cassa per donns elementars
La regenza grischuna ha mess en vigur per il 1. da schaner 2011 la revisiun da la lescha davart l'assicuranza d'edifizis, la nova lescha davart la protecziun preventiva cunter incendis ed ils fatgs da pumpiers, la revisiun parziala da la lescha davart l'indemnisaziun da donns elementars betg assicurabels sco er las ordinaziuns correspundentas. Il cussegl grond aveva approvà ils trais projects en la sessiun da zercladur 2010. Ils 22 da settember 2010 è scadì il termin da referendum senza ch'i saja vegnì fatg in referendum.
Tar tut ils trais projects da lescha vegn realisada principalmain la directiva da la constituziun chantunala, tenor la quala tut las disposiziuns impurtantas ston vegnir regladas en ina lescha. En cas da la revisiun da la lescha davart l'assicuranza d'edifizis vegnan las disposiziuns davart la relaziun d'assicuranza adattadas il medem mument als fatgs actuals. Ultra da quai vegnan las disposiziuns davart la prevenziun e davart il cumbat da donns da fieu transferidas en la nova lescha davart la protecziun cunter incendis. La terza lescha auza la finala la tariffa d'indemnisaziun maximala da la cassa per donns elementars dad oz 50 a da nov 80 pertschient.

La regenza beneventa la reintroducziun da chastis curts che priveschan da la libertad
La regenza grischuna sustegna la midada dal cudesch penal svizzer sco ch'ella vegn proponida da la confederaziun. Ella è da l'avis ch'i saja correct da reintroducir ils chastis curts che priveschan da la libertad e d'abolir ils chastis pecuniars cundiziunads.
Sco che la regenza scriva en sia resposta da consultaziun, sustegna ella la proposta dal project da tegnair quint da la critica envers il nov sistem da sancziuns tras ina midada dal dretg da sancziuns. La finamira principala è quella da supprimer il chasti pecuniar e d'abolir tant sia precedenza envers il chasti che privescha da la libertad sco er la pussaivladad da l'execuziun cundiziunada da chastis pecuniars. Tenor l'avis da la regenza è in basegn d'agir vegnì percepì cun raschun en quest reguard, cunquai che l'effect preventiv d'in chasti pecuniar cundiziunà n'è betg vesaivel. Plinavant beneventa la regenza ch'il grond dumber irritant da pussaivladads da cumbinar differentas sancziuns sco er l'execuziun cundiziunada, parzialmain cundiziunada e nuncundiziunada duai vegnir limità tras la revisiun. Ella sustegna er l'idea da reintroducir l'exiliaziun, malgrà ch'ella è sceptica, sche las finamiras ch'èn colliadas cun quai pon effectivamain vegnir cuntanschidas.
La regenza refusa dentant l'introducziun dal monitoring electronic sco ulteriura furma d'execuziun en il sectur dals chastis curts. Per l'ina èn avant maun gist en il sectur dals chastis curts gia numerusas pussaivladads da sancziun che permettan d'impedir ch'ina delinquenta u ch'in delinquent integrà vegn stratg or da ses ambient social. Per l'autra manca – tenor l'avis da la regenza – in vair caracter da sancziun a questa furma d'execuziun, uschia che las expensas considerablas per endrizzar e per manar il monitoring electronic na paran betg giustifitgadas.

Resalvas cunter la revisiun totala da la lescha federala d'alcohol
La regenza grischuna pretenda che la confederaziun fetschia tschertas correcturas vi da sias propostas da la revisiun totala da la lescha d'alcohol e dal sboz da la lescha da spirituosas. Sco che la regenza scriva en sia resposta da consultaziun a la confederaziun, na fa ella naginas objecziuns cunter ils plans da reparter ils secturs "taglias" e "prevenziun" sin dus relaschs. Ella beneventa er expressivamain l'introducziun d'ina basa legala per cumpras d'emprova. Tenor l'avis da la regenza sto questa basa vegnir introducida independentamain dal resultat da la consultaziun.
Betg d'accord n'è la regenza dentant cun il fatg ch'il sboz na cuntegna naginas disposiziuns che permettessan als chantuns d'incassar sco fin ussa ina taxa per il commerzi en detagl cun bavrondas destilladas e cun spirituosas. Ultra da quai pretenda la regenza che l'obligaziun da dumandar ina permissiun per il commerzi en detagl restia restrenschida sco fin ussa mo a spirituosas e na vegnia betg extendida sin il commerzi cun tut las bavrondas alcoholicas sco biera u vin. Cas cuntrari creschia la lavur administrativa per las commerziantas e per ils commerziants, malgrà ch'il niz è pitschen. Insumma vegn crititgà il dumber da regulaziuns strusch realisablas en il commerzi en detagl. Plitost vul la regenza ina politica d'alcohol che pretenda responsabladad e che cuntegna mesiras cunvegnentas per impedir in consum d'alcohol abusiv.
Cun las adattaziuns vul la confederaziun stgaffir las premissas per ina politica d'alcohol coerenta. Malgrà che la lescha d'alcohol vertenta è vegnida revedida pliras giadas, na satisfa ella betg pli a las realitads economicas e sociopoliticas actualas e duai vegnir remplazzada tras ina lescha davart la taglia sin spirituosas e tras ina nova la lescha d'alcohol. Tras la nova lescha davart la taglia sin spirituosas vul la confederaziun metter la basa per liberalisar il martgà d'etanol cun l'intent da simplifitgar il sistem da taglia e da controlla. Il sboz da la lescha d'alcohol fixescha disposiziuns per gronda part unitaras per il commerzi cun tut las bavrondas alcoholicas. Quai cun l'intent da proteger la giuventetgna.

Da vischnancas e da regiuns

  • Tenna: A la vischnanca da Tenna vegn garantida ina contribuziun da 38'518 francs als custs supplementars per renovar e per engrondir il stabiliment dal provediment d'aua.
  • Falera: Il project "Rempars cunter lavinas e cunter crudada da crappa sin l'Alp Dadens Sura" da la vischnanca da Falera vegn approvà e sustegnì cun ina contribuziun da maximalmain 112'000 francs.
  • Cauco: A la vischnanca da Cauco vegn garantida ina contribuziun da 120'000 francs als custs supplementars per revitalisar la zona umida "Pian de Alne".
  • Tavau: La revisiun parziala da la planisaziun locala, concludida da la vischnanca da Tavau il 1. da fanadur 2010, vegn approvada.
  • Küblis: La revisiun parziala da la planisaziun locala da la vischnanca da Küblis dals 11 da zercladur 2010 vegn approvada.
  • Scuol: La revisiun parziala da la planisaziun locala, concludida da la vischnanca da Scuol ils 25 d'avrigl 2010, vegn approvada.
  • St. Antönien: La revisiun parziala da la planisaziun locala da la vischnanca da St. Antönien dals 20 da matg 2010 vegn approvada.

Chaussas persunalas 

  • Brigitte Brun, domiciliada a Malans, è vegnida tschernida per il 1. da favrer 2011 sco secretaria dal departament d'educaziun, cultura e protecziun da l'ambient.
  • Robert Ambühl-Losa, domicilià a Tavau Vitg, è vegnì tschernì per il 1. da schaner 2011 sco president dal cussegl da la scola auta da pedagogia, e quai per il rest da la perioda d'uffizi che dura fin ils 30 da zercladur 2012. El daventa successur da Martin Jäger.

 
Gremi: regenza
Funtauna: rg chanzlia chantunala dal Grischun

Neuer Artikel