Navigaziun principala

Cuntegn da la pagina

Il chantun Grischun e radio e televisiun sa cunvegnan

  • Erste Mitteilung
  • Neuen Beitrag einfügen
Il chantun Grischun ha chattà in cumpromiss cun la radiotelevisiun svizra da lingua taliana. Il recurs da surveglianza, ch'era vegnì inoltrà il settember 2009 tar la confederaziun, vegn laschà crudar, suenter che las persunas responsablas èn prontas d'extender la purschida cun in schurnal da radio da lingua taliana.

Il chantun Grischun ed ils quatter recurrents cun domicil en las vals dal Grischun dal sid han inoltrà ils 25 da settember 2009 in recurs da surveglianza tar l'uffizi federal da communicaziun (UFCOM) a Bienna cunter la societad svizra da radio e televisiun (SRG SSR idée suisse), cunter la radiotelevisiun svizra da lingua taliana (RSI) e cunter la societad cooperativa per la radiotelevisiun da la Svizra taliana (CORSI) ed han pretendì ch'i vegnia constatà che las adversarias dal recurs n'hajan betg ademplì lur incarica da prestaziun e da concessiun. Per satisfar a l'incarica stoppian ellas plinavant vegnir incumbensadas d'instradar las mesiras necessarias entaifer in termin fixà.

En emprima lingia èsi vegnì crititgà che la populaziun da lingua taliana dal chantun Grischun vegnia infurmada memia pauc davart ils eveniments che capitan en il chantun Grischun ordaifer las vals talianas.

Ils recurrents e las adversarias dal recurs èn sa scuntrads a tractativas sut la direcziun dal schef dal UFCOM.

A chaschun da questas tractativas han las adversarias dal recurs fatg amogna d'extender lur purschida vertenta e d'emetter mintga di – da glindesdi fin venderdi vers las 19.00 – in schurnal da radio da lingua taliana da 5 fin 10 minutas en il chantun Grischun. L'emissiun ha lieu da medema maniera tecnica sco tar ils programs regiunals da DRS en la procedura da splitting, cun l'effect ch'il schurnal da radio da lingua taliana po vegnir recepì sin l'emettur d'UUC Rete Uno mo en il chantun Grischun. Quest schurnal regiunal vegn a sa restrenscher ad infurmaziuns da tut il chantun Grischun. En ina fasa iniziala vegn el a cuntanscher var 74% da la populaziun grischuna; igl è dentant previs d'extender il territori d'emissiun.

La SRG SSR idée suisse ha dumandà ils 5 d'october 2010 il schef dal DATEC, signur cusseglier federal Moritz Leuenberger, per ina permissiun correspundenta. La nova scheffa dal DATEC, dunna presidenta da la confederaziun Doris Leuthard, ha dà ils 3 da november 2010 la permissiun correspundenta. L'emprim schurnal regiunal da lingua taliana dal Grischun duai vegnir emess entaifer maximalmain 3 mais dapi la data da la permissiun.

Tras l'extensiun da la purschida d'infurmaziun en lingua taliana vegn cuvrì il basegn d'infurmaziun quotidian da las abitantas e dals abitants da lingua taliana en tut il chantun Grischun. Sut l'aspect da la purschida supplementara sco er dal consentiment che la purschida existenta da las adversarias dal recurs na vegn betg midada, laschan ils recurrents crudar il recurs da surveglianza.

Suenter avair survegnì la disposiziun da dunna presidenta da la confederaziun Doris Leuthard po il vegl disput vegnir terminà oz tras il cumpromiss chattà.


Infurmaziuns:
- president da la regenza Claudio Lardi, schef dal departament d'educaziun, cultura e protecziun da l'ambient, tel. 081 257 27 01


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel