En l'avegnir ston ins s'annunziar sin via electronica sur internet als examens d'admissiun 2011 da las scolas medias grischunas. L'uffizi per la furmaziun media-superiura ha installà ina nova software che unifitgescha las proceduras d'admissiun. Per pudair s'annunziar èsi necessari d'avair in code d'access che po vegnir retratg sur internet. En l'internet stattan plinavant a disposiziun infurmaziuns detagliadas davart ils examens d'admissiun e davart las differentas scolas medias grischunas.
 
Las annunzias als examens d'admissiun da las scolas medias grischunas vegnan fatgas da nov sur internet. Grazia al formular electronic unifitgà vegn simplifitgada la procedura d'annunzia. Persunas interessadas arrivan sut www.zap.gr.ch directamain al formular d'annunzia. Ultra da quai po lil formular vegnir consultà sur la pagina d'internet da l'uffizi per la furmaziun media-superiura (www.ahb.gr.ch). L'annunzia electronica vala tant per l'examen d'admissiun unifitgà ad ina scola media grischuna, che po vegnir fatg partind da la 2. u 3. classa secundara sco er per l'examen d'admissiun al gimnasi inferiur che po vegnir fatg partind da la scola primara. Mo per ils examens d'admissiun a las classas superiuras ston ins s'annunziar er vinavant en scrit cun ils formulars da las singulas scolas medias.

L'annunzia sur internet a l'examen unifitgà dals 15 da mars 2011 è pussaivla a partir dals 15 da november 2010 fin ils 14 da schaner 2011. Las candidatas ed ils candidats per il gimnasi inferiur pon s'annunziar a partir dals 20 da schaner 2011 fin il pli tard il 1. da mars 2011 sin via electronica per l'examen dals 30 da matg 2011.
 
Per questa annunzia è necessari in code d'access. Quest code pon ins retrair, sch'ins paja la taxa d'examen da 100 francs. Cedels da pajament cun codes d'access survegnan ins tar ils secretariats da las scolas medias, tar il secretariat da l'inspecturat da scola a Roveredo u tar l'uffizi per la furmaziun media-superiura. Sche l'annunzia sin internet ha gì success, vegn ella confermada per e-mail. Suenter è l'admissiun a l'examen valaivla.

Sut www.ahb.gr.ch sa chattan infurmaziuns detagliadas davart ils examens d'admissiun. Las candidatas ed ils candidats che n'han betg in access a l'internet pon fixar in termin cun ils secretariats da las scolas medias, cun il secretariat da l'inspecturat da scola a Roveredo u cun il secretariat d'examens da l'uffizi per la furmaziun media-superiura per s'annunziar electronicamain a l'examen.


Infurmaziuns:
dr. Hans Peter Märchy, manader da l'uffizi per la furmaziun media-superiura, tel. 081 254 12 30


Gremi: uffizi per la furmaziun media-superiura
Funtauna: rg uffizi per la furmaziun media-superiura