Zum Seiteninhalt

Communicaziun da la regenza dals 2 da december 2010

  • Erste Mitteilung
  • Neuen Beitrag einfügen

La regenza grischuna ha mess en vigur per il 1. d'avust 2012 ina revisiun parziala da la lescha da scola. Qua tras vegnan fatgas ulteriuras preparativas per l'introducziun dal nov rom d'instrucziun "enconuschientscha da las religiuns ed etica" al stgalim superiur. Ultra da quai ha la regenza formulà sias posiziuns tar consultaziuns da la confederaziun.

Ulteriuras preparativas per introducir la nova instrucziun d'enconuschientscha da las religiuns e d'etica
Il chantun Grischun vegn ad introducir il nov rom d'instrucziun "enconuschientscha da las religiuns ed etica" sin il stgalim superiur sco planisà a partir da l'onn da scola 2012/2013. La regenza grischuna ha mess en vigur per il 1. d'avust 2012 la revisiun parziala correspundenta da la lescha da scola. A medem temp ha la regenza approvà il nov plan d'instrucziun dal rom "enconuschientscha da las religiuns ed etica" per il stgalim superiur da la scola populara. Sin il stgalim primar èsi previs d'introducir il nov rom per l'onn da scola 2017/2018.
La regenza ha ultra da quai reglà la qualificaziun posteriura necessaria da las persunas d'instrucziun che vegnan ad instruir il nov rom sin il stgalim superiur da la scola populara. La scola auta da pedagogia dal Grischun è vegnida incumbensada da planisar e da realisar il perfecziunament. Ils curs da perfecziunament vegnan purschids a partir da l'onn 2011.
A chaschun da la votaziun dals 17 da matg 2009 davart l'uschenumnada iniziativa d'etica era il pievel grischun sa decidì per la cuntraproposta dal cussegl grond respectivamain per il "model 1+1". Quel cuntegna d'ina vart sco fin ussa ina lecziun per emna instrucziun da religiun per scolaras e per scolars che appartegnan ad ina da las duas baselgias chantunalas. Per questa lecziun èn responsablas las baselgias. Da l'autra vart prevesa il model da nov ina lecziun per emna instrucziun d'enconuschientscha da las religiuns e d'etica ch'è obligatorica per tut las scolaras e per tut ils scolars.

Resalvas envers la nova ordinaziun federala davart atterraments ordaifer las plazzas aviaticas
La regenza grischuna beneventa l'intenziun da la confederaziun da reglar atterraments d'eromobils ordaifer las plazzas aviaticas da nov en in'atgna ordinaziun federala. Ella pretenda dentant differentas adattaziuns. Uschiglio na po la regenza betg approvar il sboz da l'ordinaziun davart il partir e l'atterrar cun eromobils ordaifer las plazzas aviaticas.
Sco che la regenza ha declerà en sia resposta da consultaziun a la confederaziun vegnan relaschadas cun questa ordinaziun disposiziuns per gronda part confurmas al temp per atterraments ordaifer las plazzas aviaticas. Quellas integreschan ultra dals aspects da l'aviatica er las dumondas da la planisaziun dal territori e da la protecziun da l'ambient e coordineschan ellas ina cun l'autra.
Tenor l'avis da la regenza na vegnan ils basegns dals chantuns da muntogna dentant en plirs secturs betg resguardads en moda suffizienta. Ella menziunescha qua sco exempel en spezial las restricziuns en connex cun atterraments ordaifer las plazzas aviaticas en parcs naziunals ed en territoris federals scumandads per la chatscha. Il medem vala per atterraments ordaifer las plazzas aviaticas en las muntognas per motivs da scolaziun. Er vegnan stgaffids obstachels birocratics nunnecessaris per atterraments ordaifer las plazzas aviaticas che servan a la scolaziun ed a la furmaziun supplementara en cas d'acziuns da salvament e da stizzar fieu. En quests secturs sto l'ordinaziun davart atterraments ordaifer las plazzas aviaticas vegnir concepida en moda pli flexibla e pli pratica.

La revisiun planisada da las ordinaziuns federalas davart ils narcotics e las substanzas psicotropas vegn beneventada
La regenza grischuna beneventa la revisiun da las ordinaziuns davart ils narcotics e las substanzas psicotropas ch'è planisada da la confederaziun. Ella va d'accord cun il concept da resumar las otg differentas ordinaziuns actualas en trais novs relaschs. Quai menziunescha la regenza en sia audiziun a la confederaziun. Tar las trais novas ordinaziuns tutgan l'ordinaziun davart la controlla da narcotics e da substanzas psicotropas, l'ordinaziun davart la dependenza da narcotics e da substanzas psicotropas sco er l'ordinaziun davart il register da narcotics e da substanzas psicotropas.
La regenza beneventa er explicitamain il relasch da l'ordinaziun davart la dependenza da narcotics e da substanzas psicotropas sco ordinaziun separada. Quella regla la realisaziun da las mesiras da las quatter pitgas prevenziun, terapia, diminuziun dal donn e controlla en cas da disturbis che resultan da la dependenza.
Las adattaziuns èn necessarias suenter che la revisiun parziala da la lescha federala davart ils narcotics e las substanzas psicotropas, concludida dal parlament ils 20 da mars 2008, è vegnida approvada da la populaziun a chaschun da la votaziun da referendum dals 30 da november 2008.

Da vischnancas e da regiuns 

  • Favugn: A la vischnanca da Favugn vegn garantida ina contribuziun chantunala da construcziun da 197'600 francs per midar e per engrondir la chasa da scola.
  • Vaz sut: La vischnanca da Vaz sut survegn ina contribuziun chantunala da construcziun da 2'127'000 francs per midar e per engrondir la chasa da scola.
  • Bregaglia: La revisiun totala da la planisaziun locala, concludida da la vischnanca da Castasegna (dapi il 1. da schaner 2010 vischnanca da Bregaglia) ils 27 da november 2009, vegn approvada.
  • Scuol: La revisiun parziala da la planisaziun locala "Hotel Belvédère", concludida da la vischnanca da Scuol ils 30 da mars 2008, vegn approvada.
  • Tschappina: La revisiun parziala da la planisaziun locala da la vischnanca da Tschappina dals 14 da zercladur 2010 vegn approvada.

 
Contribuziuns chantunalas a differentas instituziuns 

  • Forum economic da la regiun dal parc naziunal: Al forum economic da la regiun dal parc naziunal vegn garantida per la perioda 2011 – 2015 ina contribuziun maximala da totalmain 825'000 francs (maximalmain 165'000 francs per onn) al manaschament regiunal en il rom da la nova politica regiunala da la confederaziun (NPR).
  • Lavuratori d'emprendissadi engiadinais per scrinarias e per scrinaris: Il project da construcziun per l'engrondiment dal lavuratori d'emprendissadi engiadinais per scrinarias e per scrinaris a Samedan vegn approvà e sustegnì cun ina contribuziun chantunala da maximalmain 733'600 francs.
  • Federaziun grischuna per il sport: La regenza ha fixà la contribuziun pauschala 2010 per las federaziuns da sport e per las organisaziuns ch'èn affiliadas a la federaziun grischuna per il sport. La contribuziun dad 1'000'000 francs or dal fond da sport vegn repartida sin totalmain 46 federaziuns ed organisaziuns.
  • GKB-SPORTKIDS: Al project GKB-SPORTKIDS vegn concedida per l'onn da trenament 2011/12 ina contribuziun da maximalmain 150'000 francs or dal fond da sport.
  • Engiadina Nordic: Il project "biatlon" da l'uniun Engiadina Nordic per engrondir la gruppa da trenament e da prestaziun vegn sustegnì cun ina contribuziun da 100'000 francs or dal fond da sport.

 

Gremi: regenza
Funtauna: rg chanzlia chantunala dal Grischun

Neuer Artikel