Il svilup e la realisaziun da la cunvegna davart l'associaziun da la Svizra a la reglamentaziun da Schengen/Dublin ha ulteriuras consequenzas per la populaziun estra. A partir dals 24 da schaner 2011 vegnan fatgs novs documents da legitimaziun per persunas estras cun datas biometricas.

Per ils 24 da schaner 2011 metta il cussegl federal en vigur las novas disposiziuns da la legislaziun davart las persunas estras. Necessarias èn questas midadas pervia dal svilup da la cunvegna davart l'associaziun da la Svizra a la reglamentaziun da Schengen/Dublin. Persunas che n'èn betg burgaisas d'in stadi da la UE survegnan a partir da questa data in nov document da legitimaziun per persunas estras cun datas biometricas, sch'ellas sa trategnan pli ditg che 4 mais en Svizra e sch'ellas na pon betg sa referir a la cunvegna davart la libra circulaziun da persunas. Requirentas e requirents d'asil èn exceptads.

La vischnanca sto controllar l'identitad da la persuna. Perquai sto la dumonda vegnir inoltrada persunalmain a la controlla d'abitantas e d'abitants cumpetenta. En il chantun Grischun vegnan las persunas estras alura clamadas per fixar in termin tar in center da documents d'identitad. La registraziun da las datas biometricas ha lieu en in dals centers da documents d'identitad gia existents a Cuira ed a Zernez, nua che era burgaisas svizras e burgais svizzers pon laschar registrar lur datas biometricas per il pass svizzer. La visita d'in center da documents d'identitad è uschia stringentamain necessaria er per las burgaisas ed ils burgais esters da terzs stadis.

Las datas biometricas èn valaivlas per tschintg onns e vegnan arcunadas per la producziun da novs documents d'identitad. Las legitimaziuns existentas da persunas estras restan valaivlas e vegnan pir remplazzadas tras in nov document da legitimaziun per persunas estras cun datas biometricas, sch'ellas scadan.

Novas taxas
Il mument che la novaziun da la cunvegna davart l'associaziun entra en vigur introducescha la confederaziun in nov model da taxas. La taxa singula per in document da legitimaziun sa cumpona d'ina taxa da permissiun, d'ina taxa d'emissiun e d'ina taxa per registrar datas biometricas.


Infurmaziuns:
Markus Haltiner, substitut dal directur da l'uffizi da fatgs da polizia e da dretg civil dal Grischun, tel. 081 257 25 22


Gremi: uffizi da fatgs da polizia e da dretg civil
Funtauna: rg uffizi da fatgs da polizia e da dretg civil