Il 1. da favrer vegn averta la biblioteca digitala da la Svizra orientala. Igl è in project communabel da 14 bibliotecas da la Svizra orientala e da la biblioteca naziunala dal Liechtenstein. La basa dal project è la biblioteca digitala vertenta da Son Gagl. Sia purschida da titels vegn engrondida considerablamain, uschia ch'ella daventa anc pli attractiva.
En las bibliotecas dominescha l'emprest da cudeschs anc adina sco activitad la pli impurtanta, dapi intgin temp sa mussa dentant che l'intermediaziun da mediums electronics daventa ina part d'ina purschida bibliotecara moderna. Quai ch'è gia la normalitad bibliotecara en ils Stadis unids po er vegnir observà adina pli savens en bibliotecas europeicas: purschidas da bibliotecas sur l'internet.
Project cun success
La biblioteca digitala da Son Gagl, ch'è vegnida iniziada da la biblioteca chantunala Vadiana, ha cuntanschì passa 15'000 emprests durant stgars trais onns. Il project curunà da success vegn ussa engrondì considerablamain e manà vinavant sco biblioteca digitala da la Svizra orientala. Da nov sa participeschan las bibliotecas chantunalas da tuts dus Appenzells, da Glaruna, dal Grischun e da la Turgovia sco er las bibliotecas da la citad da Schaffusa e la biblioteca naziunala dal Liechtenstein. Uschia resulta per l'emprima giada en l'istorgia bibliotecara da la Svizra orientala ina collavuraziun da l'entira regiun. Il 1. da favrer cumenza la purschida sut www.dibiost.ch e www.dibiost.li, la biblioteca chantunala da la Turgovia e las bibliotecas da la citad da Schaffusa vegnan tiers in pau pli tard (las bibliotecas da la citad da Schaffusa il 1. da mars, la biblioteca chantunala da la Turgovia il 1. d'avrigl).
Schlargiament da la purschida
Cun l'instituziun responsabla nova po la purschida da titels da la biblioteca digitala da la Svizra orientala vegnir engrondida ed actualisada dad actualmain 8'000 sin circa 12'000 titels. Uschia po l'attractivitad anc ina giada vegnir auzada considerablamain. En cas ch'exemplars vegnan reservads pliras giadas, duain vegnir cumprads novs exemplars. Ultra d'ina vasta purschida da 5000 titels da musica dal label Naxos èn oravant tut avant maun mussavias e belletristica, dentant er litteratura d'uffants e da giuvenils, meds auxiliars per la scola, videos e – quai ch'è spezialmain dumandà – cudeschs auditivs.
Gratuit per tut las utilisadras e per tut ils utilisaders registrads
La purschida da las bibliotecas partenarias è gratuita per tut las utilisadras e per tut ils utilisaders registrads. Ultra da quai è la purschida averta en ils chantuns Grischun, Appenzell dadens ed Appenzell dador per las bibliotecas colliadas, per las bibliotecas da scola e per las bibliotecas communalas, entant che sis bibliotecas communalas e la mediateca da la scola auta da pedagogia èn colliadas en il chantun Son Gagl. Las bibliotecas stattan bunas per l'observaziun dal dretg d'autur, per la qualitad e per la protecziun da la giuventetgna.
Bibliotecas da partenari da la biblioteca digitala da la Svizra orientala:
- biblioteca chantunala da l'Appenzell dador, Trogen
- biblioteca chantunala da l'Appenzell dadens, Appenzell
- biblioteca chantunala da Glaruna
- biblioteca chantunala dal Grischun, Cuira
- biblioteca naziunala dal Liechtenstein, Vaduz
- biblioteca chantunala Vadiana Son Gagl
- bibliotecas da la citad da Schaffusa
- biblioteca chantunala da la Turgovia, Frauenfeld
- biblioteca Reburg Altstätten
- biblioteca populara da Gossau
- bibliotecas da Rapperswil-Jona
- biblioteca da la citad dad Uznach
- biblioteca communala dad Uzwil
- biblioteca da la citad da Wil
- mediateca da la scola da pedagogia da Son Gagl
Infurmaziuns:
dr. Christine Holliger bibliotecaria chantunala, telefon 081 257 28 21, christine.holliger@kbg.gr.ch
Gremi: biblioteca chantunala dal grischun
Funtauna: rg biblioteca chantunala dal grischun