Ils contacts persunals dad oz avran damaun las portas. Tenor quest motto sa scuntran a Cuira a chaschun da "l'event da trampolin" dal venderdi, ils 6 da matg 2011 studentas e students cun interpresas da la regiun dal Grischun. La finamira da questa occurrenza èsi da simplifitgar a studentas ed a students l'access a l'economia grischuna.
Contacts cun profunditad
"L'event da trampolin" è in'occurrenza da contact fitg speziala. En lavuratoris che han lieu directamain en las interpresas participantas schlian studentas e students sco er absolventas ed absolvents da scolas autas spezialisadas e da scolas autas universitaras, cuminaivlamain cun represchentantas e represchentants da las dudesch interpresas che sa participeschan, dumondas interessantas da la pratica d'interpresa. Uschia pon omaduas partidas emprender ad enconuscher ina l'autra. Quai n'è dentant anc betg tut: Cun lavurar vi d'ina dumonda ord l'incumbensa quotidiana da l'interpresa survegnan las studentas ed ils students ina invista pli detagliada dal champ d'incumbensas da quella interpresa. Plinavant pon las participantas ed ils participants da "l'event da trampolin" s'infurmar il suentermezdi tard en il b12 caffè & bar a Cuira davart lavurs da bachelor e da master sco er davart praticums u davart plazzas d'access.
Organisaziun cun ina vasta basa
La finamira da "l'event da trampolin" è quella da gudagnar studentas e students sco er absolventas ed absolvents da scolas autas spezialisadas e da scolas autas universitaras per la regiun dal Grischun. Uschia sa lascha far frunt a l'uschenumnà "brain drain" a la perdita da glieud intelligenta. Incumbensadras ed incumbensaders da l'occurrenza èn l'uffizi per economia e turissem, l'uffizi per la furmaziun media-superiura sco er la SATE Cuira. "L'event da trampolin" vegn organisà da la together SA. Il sponsur principal è la banca chantunala grischuna. L'occurrenza da contact è vegnida lantschada l'onn 2006 dal chantun ed ha lieu per la 5avla giada.
Dudesch interpresas participadas
Suandantas interpresas porschan lavuratoris a "l'event da trampolin" dal venderdi, ils 6 da matg 2011 a Cuira:
- CSEM SA: Tia atgna interpresa da high-tech en la Val dal Rain alpin
- Banca chantunala grischuna: Social Media & Web 2.0: Pussaivladads sco patruna u patrun
- Griston Holding SA: Ideas da marketing per ina resursa custaivla dal futur
- GRITEC High Tech Engineering: GRITEC maschina d'innovaziun
- Hamilton Bonaduz SA: Constataziun intelligenta da sbagls en l'automatisaziun
- Inventx SA: Identifitgar en moda termaglianta potenzials d'investiziun da la tecnologia d'infurmaziun
- Polycontact SA: Da la furmla 1 tar la producziun da massa
- Repower SA: Sistem actual d'infurmaziun da management
- Riedi Ruffner Theus SA: Cusseglia ina interpresa tar sia successiun
- Interpresa TRUMPF Grüsch: SYNCHRO: Management satigl da l'avegnir
- U-NICA International SA: Bler tecnologia per pli paucas falsificaziuns
- Würth International SA: Tge pussaivladads porscha "social media"?
Ulteriuras infurmaziuns ed annunzia
Studentas interessadas e students interessads pon s'annunziar a partir d'immediat per "l'event da trampolin" sut: www.sprungbrett-events.ch. L'ultim termin d'annunzia è ils 17 d'avrigl 2011.
Persuna da contact:
Martina Gehrig, together sa, Poststrasse 18, chascha postala 2150, 9001 Son Gagl, tel. 071 222 28 18.
Gremi: uffizi per economia e turissem
Funtauna: rg uffizi per economia e turissem