Navigation

Inhaltsbereich

  • Erste Mitteilung
  • Neuen Beitrag einfügen
Pervia dal grond privel da fieu per la cultira e per il guaud ha l'uffizi forestal relaschà in scumond absolut da far fieu en tut il Grischun.

L'uffizi forestal avertescha dal grond privel da fieu per la cultira e per il guaud en tut il Grischun. Dapi pliras emnas n'hai betg pli pluvì avunda. L'aura da primavaira fitg temprada e la setgira da las ultimas emnas han setgentà fermamain il terren e las stresas da vegetaziun. Plinavant datti – durant la stagiun actuala – en blers lieus ervas e chaglias setgadas che pon facilmain pigliar fieu. Sch'i dat in incendi en la vegetaziun setga da l'onn precedent, po il fieu sa derasar fitg svelt. Tras la malprecauziun cun fieus da rumida en l'agricultura, cun products da fimar e cun fuclars hai adina puspè dà – durant las emnas passadas – incendis che han pudì vegnir stizzads a temp mo grazia a la svelta intervenziun dals pumpiers.

En tut il Grischun vala in scumond absolut da far fieu en ils guauds ed en la vischinanza dals guauds. Products da fimar e battafieus na dastgan betg simplamain vegnir bittads davent. Las plazzas da grillar en ils guauds ed en la vischinanza dals guauds na dastgan betg vegnir duvradas. Che la situaziun sa mitigeschia, dastga vegnir spetgà pir suenter plievgias intensivas. Uradis curts u urizis n'èn betg en cas da reducir avunda la setgira da primavaira.

Ulteriuras infurmaziuns sco er la valitaziun da la situaziun actuala chattais Vus sut: www.wald.gr.ch


Infurmaziuns:
- signur Andrea Kaltenbrunner, uffizi forestal, tel. 081 257 38 68


Gremi: uffizi forestal
Funtauna: rg uffizi forestal
Neuer Artikel