Cun duvrar in nov logo stgaffeschan las bibliotecas publicas en il chantun Grischun ina plattafurma communabla.

La pli gronda gruppa da las 80 bibliotecas en il chantun sa cumpona da las 54 bibliotecas da scola e communalas. Questas bibliotecas publicas dattan access a 507'845 mediums. L'onn passà èn vegnids emprestads passa in milliun mediums.

In giavisch principal da las manadras e dals manaders da las bibliotecas è da demussar en moda communabla e pli intensiva las prestaziuns e las purschidas da las bibliotecas. Quai vulan ellas cuntanscher cun in corporate design. Il logo ch'è vegnì creà da nov garantescha da vegnir reconuschì e stgaffescha ina plattafurma communabla per las bibliotecas en il chantun.  




Il logo che las bibliotecas dal Grischun pon duvrar a partir d'immediat è in segn cun pleds. Igl è in logo chapaivel e simpel, dentant er marcant. El reflectescha la trilinguitad dal chantun. L'apostrof signifitgescha la communicaziun, il barat, l'emprender e l'instruir. A medem temp furma el ina corna stilisada d'in capricorn. Cun duvrar il medem logo duai vegnir garantì che las bibliotecas dal Grischun vegnian identifitgadas cleramain e ch'ellas vegnian reconuschidas. Ultra da quai duai vegnir exprimida ina plattafurma communabla da las bibliotecas dal Grischun.


Infurmaziuns:
- Nelly Däscher, incumbensada da las bibliotecas dal chantun Grischun, tel. 081 257 28 37


Gremi: biblioteca chantunala dal Grischun
Funtauna: rg biblioteca chantunala dal Grischun