La regenza grischuna ha avert la procedura da consultaziun per ina revisiun parziala da la lescha introductiva tar il cudesch civil svizzer per realisar il nov dretg da protecziun da l'uffant e da creschids. Il punct central dal project è da crear ina nova autoritad chantunala da protecziun da l'uffant e da creschids cun filialas che remplazzan l'autoritad tutelara dad oz. Las avugadias uffizialas, da nov assistenzas professiunalas, duain vegnir manadas da las corporaziuns regiunalas fin che la refurma communala e territoriala è terminada.
Il 1. da schaner 2013 entra en vigur il nov dretg federal da protecziun da l'uffant e da creschids. Fin alura han ils chantuns d'adattar lur legislaziun e d'installar l'organisaziun necessaria da las autoritads. Cun la revisiun dal cudesch civil svizzer ha la confederaziun en mira da professiunalisar ils fatgs tutelars, damai ch'il svilup social porta problems cumplitgads e sfidas cumplexas. En il center stat la furmaziun d'autoritads spezialisadas che sa cumpona interdisciplinarmain (autoritads da protecziun da l'uffant e da creschids) per pudair dumagnar meglier las pretensiuns creschentas.
Organisaziun nova da las autoritads en il chantun
Pervia da las prescripziuns stringentas dal dretg federal sto vegnir installada ina nova organisaziun administrativa en il chantun Grischun. Las autoritads tutelaras existentas na pon betg satisfar a las pretensiuns novas dal dretg federal, e quai malgrà las fusiuns che han gì lieu en il passà. Ultra da quai è l'intschess da las 17 autoritads tutelaras dad oz memia pitschen. Or da quest motiv propona la regenza da stgaffir in'autoritad da protecziun da l'uffant e da creschids cun trais filialas. Cun questas structuras decentralas che resguardan ils basegns da las burgaisas e dals burgais na po il chantun betg mo stgaffir plazzas da lavur attractivas en las regiuns, mabain er ademplir las pretensiuns dal dretg federal. Las autoritads sa cumponan en emprima lingia da commembras e da commembers che lavuran en uffizi cumplain u principal sco persunas dal fatg da las trais disciplinas da coc (dretg, lavur sociala e pedagogia/psicologia). Ulteriuras disciplinas impurtantas sco medischina/psichiatria/geriatria e dumondas fiduziarias/administraziun da la facultad pon vegnir occupadas tras engaschaments en uffizi accessoric. L'autoritad chantunala da protecziun da l'uffant e da creschids che vegn organisada decentralmain vegn sustegnida d'in agen secretariat che ademplescha incumbensas oravant tut dals secturs scleriment dal dretg e cussegliaziun, revisurat ed administraziun.
En connex cun la nova structuraziun da las autoritads ston er las avugadias uffizialas d'enfin ussa (en l'avegnir assistenza professiunala) vegnir organisadas da nov. Quellas duain vinavant esser francadas en las regiuns. Per ch'ellas demussian ina grondezza dal manaschi adattada las ston vegnir assegnadas ulteriuras incumbensas. Ultra da l'execuziun professiunala dals mandats duain ellas esser cumpetentas per far scleriments socials sco er per recrutar, per cussegliar e per sustegnair las assistentas ed ils assistents privats. Uschia na vegnan betg mo mantegnidas plazzas da lavur existentas mabain er stgaffidas novas plazzas en las regiuns. Damai che l'attribuziun da las incumbensas sto vegnir fatga sin fundament da las structuras existentas, vegn la responsabladad per manar las assistenzas professiunalas surdada – en il senn d'ina soluziun transitorica – a las corporaziuns regiunalas. Las incumbensas da quellas èn oravant tut d'eleger il persunal e da metter a disposiziun l'infrastructura necessaria. En il rom da la refurma communala e territoriala prevesa la regenza d'incorporar las incumbensas tar las regiuns.
Il chantun finanziescha la nova autoritad da protecziun da l'uffant e da creschids
Sin fundament dal transferiment da las incumbensas dals circuls al chantun porta tal en l'avegnir ils custs per l'autoritad da protecziun da l'uffant e da creschids. Quests custs supplementars importan stgars tschintg milliuns francs per onn. Sco fin ussa vegnan las vischnancas a finanziar las assistenzas professiunalas. Damai che l'augment dals custs tar las assistenzas professiunalas correspunda circa a la distgargia finanziala en consequenza da la scrudada da la finanziaziun da las autoritads tutelaras, na vegn la realisaziun dal dretg da protecziun da l'uffant e da creschids probablamain betg a chaschunar custs supplementars a las vischnancas.
Il dretg tutelar vertent è restà praticamain senza midadas dapi l'entrada en vigur l'onn 1912. Sin fundament da midadas socialas, economicas e dal dretg sco er pervia da basegns sa midads è ina revisiun dal dretg tutelar daventada inevitabla.
La consultaziun davart il sboz da la lescha dura fin ils 8 da fanadur 2011. Ils documents èn avant maun sin la pagina d'internet dal departament da giustia, segirezza e sanadad (
www.djsg.gr.ch).
Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, 081 257 25 01
Gremi: regenza
Funtauna: rg chanzlia chantunala dal Grischun