Il scumond absolut da far fieu en ils guauds ed en la vischinanza dals guauds è a partir d'immediat abolì en l'entir Grischun.

Las precipitaziuns dals ultims dis e la sbassada marcanta da la temperatura han manà ad ina tscherta detensiun en connex cun il privel d'incendis da guaud. Il scumond absolut da far fieu en il chantun Grischun ha pia pudì vegnir abolì. En cas che las temperaturas s'augmentan puspè e l'aura resta bella sto vegnir fatg quint ch'il privel d'incendis da guaud crescha danovamain. Perquai na poi betg vegnir exclus ch'il scumond da far fieu sto lura puspè vegnir introducì.

Sin fundament da la perioda extraordinaria da chalur da las ultimas emnas n'è il terren dal guaud anc betg bagnà tras dal tut. Perquai èsi d'esser spezialmain precaut cun far fieu. Fieus envidads ston vegnir survegliads ed avant ch'ir davent vegnir stizzads conscienziusamain. Products da fimar e battafieus na dastgan betg simplamain vegnir bittads davent. Che la situaziun sa mitigeschia dal tuttafatg, dastga vegnir spetgà pir suenter ina perioda intensiva da plievgia.

Ulteriuras infurmaziuns sco er la valitaziun da la situaziun actuala chattais Vus sut: www.wald.gr.ch


Infurmaziuns:
- Ueli Eggenberger, uffizi forestal, tel. 081 257 38 58


Gremi: uffizi forestal
Funtauna: rg uffizi forestal