Navigation

Inhaltsbereich

  • Erste Mitteilung
  • Neuen Beitrag einfügen
Suenter l'ingiant da la resgia gronda da Domat tras la Klausner Holz Thüringen GmbH che vul demontar l'implant per al fabritgar si en in auter lieu, sa tschentan dumondas fundamentalas en connex cun l'areal restant che ston vegnir scleridas.

La vischnanca burgaisa da Domat sco proprietaria da l'areal, la vischnanca politica da Domat sco er il chantun vulan analisar cuminaivlamain e detagliadamain la situaziun suenter l'ingiant dal glindesdi passà e tschertgar ensemen ina soluziun prospectiva.

En in emprim pass sa tracti da prender per mauns las numerusas dumondas avertas ch'èn per part cumplexas e che dependan – pervia da la situaziun da concurs – parzialmain er da facturs che na pon betg vegnir influenzads. Per il mument èsi mo cler che l'areal dastga vegnir duvrà – tenor la planisaziun locala actuala da la vischnanca da Domat sco er tenor il contract da dretg da construcziun valaivel tranter la vischnanca burgaisa da Domat e l'utilisadra vertenta da l'areal – unicamain per l'installaziun e per la gestiun d'ina resgia da lain sco er d'autras interpresas ch'èn activas sin il champ da l'elavuraziun da lain. Premess ch'ins vuless duvrar l'areal u parts da tal en il futur per auters intents che per l'elavuraziun da lain, sto vegnir fatga obligatoricamain – ultra da l'adattaziun dal contract e dal tschains da dretg da construcziun – tranter auter ina midada da zona da l'areal u da parts da tal en il rom da la planisaziun locala communala. Quai è collià cun blers obstachels e cun bleras dumondas avertas e sto – tras lescha – vegnir suttamess en in ultim pass a las votantas ed als votants da Domat per laschar prender ina decisiun definitiva.

Il proxim punct impurtant vegn ad esser l'ingiant dal dretg da construcziun che vegn ad avair lieu ils 22 da settember 2011. Suenter ils 22 da settember e suenter avair analisà las decisiuns ch'èn vegnidas prendidas alura vegnan la vischnanca burgaisa e la vischnanca politica da Domat sco er il chantun ad infurmar danovamain la publicitad.


Infurmaziuns:
- Theo Haas, president da la vischnanca burgaisa da Domat, tel. 081 633 48 00
- Beatrice Baselgia, presidenta communala da Domat, tel. 081 632 82 24
- cusseglier guvernativ Hansjörg Trachsel, schef dal departament d'economia publica
e fatgs socials, tel. 081 257 23 15


Gremi: departament d'economia publica e fatgs socials
Funtauna: rg departament d'economia publica e fatgs socials
Neuer Artikel