A la festa da Cuira da quest onn, dals 19 fin ils 21 d'avust, sin l'Arcas, vai per sa mover regularmain e per sa nutrir en moda equilibrada en il Grischun. Durant il di pon las visitadras ed ils visitaders cumprovar lur passiun per il sport en gieus da concurrenza ed en lavuratoris, la saira vegnan dentant er concerts live e shows ad animar la festa da Cuira. Il carburant culinaric per prestaziuns maximalas dat René Schudel, ch'è enconuschent tras l'emissiun da cuschinar "Funky Kitchen Club".

Il club da skis e d'aissas Rezia Cuira sco er il club da ballarait Cuira èn las uniuns ospitantas sin l'Arcas. En collavuraziun cun il program chantunal "grischun en moviment" vegn offrì a las visitadras ed als visitaders da tut las vegliadetgnas in program accumpagnant nunconvenziunal en in ambient termagliant ed animà. In flyer detaglià dal program vegn a simplifitgar la survista.

Sfidas termagliantas e sportivas
En il "percurs da stil liber" è dumandada la coordinaziun, dentant cunzunt il curaschi envers impediments sco mattratschinas u sco fists flexibels. Gieus gronds plain acziun che derivan da tut il mund stattan a disposiziun en il parc "gioga fin che ti es fit" e vegnan assistids professiunalmain. Intgins gieus pretendan segirezza da culp, auters tactica. En ils lavuratoris da "sport stacking" vegn activada la collavuraziun da las duas mesadads dal tscharvè e rinforzada la capacitad da concentraziun.
La prioritad dal program animà è cleramain il divertiment. En quest senn spetga las visitadras ed ils visitaders da la festa er la sfida "batta il campiun", nua ch'ellas ed els pon sa mesirar cun la prominenza grischuna da sport – tranter auter Jacqueline Gasser ed Ambrosi Hoffmann – en il seser cunter la paraid. Pervia dal grond plaschair ha Zumba fitness obtegnì in status da cult. Zumba fitness è ina cumbinaziun da saut e da fitness a ritmus chauds da l'America latina. Ils lavuratoris da "Zumba" èn in'occasiun ideala per emprender d'enconuscher la sensaziun da fitness en in curs d'emprova sin l'Arcas.

Program da la saira animà
Il venderdi saira e la sonda saira procuran las "shows da Zumba" sin la tribuna principala per moviment e collian cun il program musical. Ils rappers grischuns talians Cigi ed il producent Lou Geniuz vegnan ad accumpagnar las "shows da Zumba". Cun Hampa & the Charmes, NoNames, Freeze e cun ils fossils da rock May Day stat la tribuna principala da l'Arcas dal tuttafatg sut l'ensaina da la musica grischuna.

"Soul food" grischun da e cun René Schudel
Tar in stil da vita activ tutga er in nutriment equilibrà. Il cuschinunz a stailas René Schudel ha acceptà la sfida da crear exclusivamain per la festa da Cuira quatter tschaveras "Soul food" che vegnan preparadas cun l'infrastructura al lieu. Sco punct culminant particular vegn il cuschinunz da la televisiun renumà a cuschinar persunalmain dumengia sin l'Arcas ed a dar a las visitadras ed als visitaders da la festa ina invista en la cuschina sauna.

grischun en moviment – muventa il Grischun
Cun il program "grischun en moviment" reagescha il chantun Grischun en collavuraziun cun la promoziun da la sanadad Svizra sin il fatg che adina dapli uffants e giuvenils pateschan da surpais. Uffants e giuvenils dovran in conturn, nua ch'els pon sa mover bler e siglir enturn. Medemamain basegnan els tschaveras frestgas e variadas ch'els mangian ensemen cun la famiglia u cun autras persunas da confidenza. Il program "grischun en moviment" gida a promover in tal conturn. Ensemen cun vischnancas, cun scolinas, cun scolas e cun persunas spezialisadas vegnan realisads projects che promovan las cundiziuns generalas per in pais saun. La represchentaziun a la festa da Cuira da quest onn è ina part da la lavur da publicitad e duai gidar a motivar la populaziun d'utilisar ils spazis per giugar e per sa mover sco er las purschidas per far sport.

Ulteriuras infurmaziuns sut: www.graubuenden-bewegt.ch  

Termins d'intervista cun René Schudel
En accordanza cun ses manaschament vegn René Schudel a star a disposiziun per termins d'intervista. Accreditaziuns per intervistas vegnan coordinadas sur 08EINS directamain cun il manaschament da Schudel. Dumondas per accreditaziuns trametter per plaschair directamain ad Anita Willi (08EINS).

Contact cun l'instituziun responsabla per la plazza
Club da skis e d'aissas Rezia Cuira
Daniel Ruckstuhl
Via Quadras 13
CH-7013 Domat
tel. +41 (0)79 419 03 01
ruckstuhl-joos@bluewin.ch  

Contact cun grischun en moviment
Uffizi da sanadad dal Grischun
Denise Rudin Philipp
Planaterrastrasse 16
CH-7001 Cuira
tel. +41 (0)81 257 25 18
tel. +41 (0)78 746 42 20
denise.rudin@san.gr.ch  

Contact cun il manaschament da projects & accreditaziun per las medias
08EINS – Agentura per marketing cun cultura.
Anita Willi
Kornplatz 12
CH-7000 Cuira
tel. +41 (0)81 250 60 81
anita.willi@08eins.ch  

Gremi: uffizi per la scola populara ed il sport
Funtauna: rg uffizi per la scola populara ed il sport