Per l'onn da preventiv 2013 vul il chantun Grischun introducir il model armonisà da contabilitad MAC2. Las vischnancas politicas duain midar lur rendaquint al nov standard entaifer 5 onns suenter ch'il MAC2 è vegnì introducì tar il chantun. La regenza ha deliberà la missiva correspundenta per ina revisiun totala da la lescha da finanzas dal chantun Grischun (LFC). Il cussegl grond vegn a tractar questa fatschenta en la sessiun d'october 2011.
Il MAC2 vul cunzunt augmentar la transparenza da la situaziun da la facultad, da las finanzas e dal retgav sco er la cumparegliabladad dals quints da tut las communitads publicas. A medem temp vegnan adattadas las metodas da rendaquint dal maun public a quellas da l'economia privata. La nova lescha da finanzas, che vegn preschentada da la regenza, sa basa fermamain sin il model d'ina lescha dal MAC2 da la conferenza da las directuras e dals directurs chantunals da finanzas (CDF).
Novs elements per il rendaquint
Tras l'introducziun dal MAC2 resultan en differents secturs dal rendaquint novs elements. Tranter auter vegn l'agiunta al quint annual cumplettada cun ina glista da las participaziuns, cun ina glista da las garanzias e cun ina cumprova da l'agen chapital. Plinavant daventi obligatoric da manar in quint da cash flow sco er ina contabilitad da la facultad investida. Novaziuns resultan er tras ina cumprova dal gudogn e da la perdita sin plirs stgalims e tras in nov plan dals contos armonisà, tar la valitaziun da la facultad da finanzas e da la facultad administrativa sco er tar las amortisaziuns.
La regenza tegna per gronda part quint dals giavischs da las participantas e dals participants da la consultaziun. Tenor quels duain las vischnancas politicas pudair duvrar er vinavant quints cun buns resultats per far amortisaziuns extraordinarias. Impurtantas èn la transparenza e la cumparegliabladad dals quints communals. Il termin d'introducziun da 5 onns permetta da rimnar emprimas experientschas cun vischnancas da model. Fin l'onn 2018 duai il MAC2 esser introducì en tut las vischnancas. L'uffizi da vischnancas vegn a dar in sustegn specific a las vischnancas tar la realisaziun.
Per las corporaziuns regiunalas e per las corporaziuns da vischnancas valan las prescripziuns mo confurm al senn. I vegn desistì da fixar standards minimals. Las vischnancas burgaisas duain dentant render quint autonomamain en l'avegnir.
Lescha separada davart la surveglianza da las finanzas
A medem temp ha la regenza deliberà la missiva per il relasch d'ina lescha separada davart la surveglianza da las finanzas. Questa lescha davart la surveglianza da las finanzas surpiglia – cun paucas adattaziuns redacziunalas – ils artitgels 38 fin 57 da la lescha existenta davart las finanzas e davart la surveglianza da las finanzas. Areguard il cuntegn vegn adattada sulettamain la disposiziun davart la concepziun dal gremi paritetic da la regenza e da la cumissiun da gestiun.
Infurmaziuns:
president da la regenza dr. Martin Schmid, schef dal departament da finanzas e vischnancas, tel. 081 257 32 01
Agiunta:
Botschaft der Regierung an den Grossen Rat, Heft Nr.3/2011-2012
Gremi: regenza
Funtauna: rg chanzlia chantunala dal Grischun