Il chantun Grischun vul prender ina posiziun directiva en l'agroturissem da la Svizra. Cun il conclus da la regenza dals 10 da matg 2011 è vegnì lantschà il project "Agroturissem dal Grischun". Il secretariat per l'agroturissem dal Grischun ha cumenzà cun sia lavur operativa il 1. da fanadur 2011 e duai gidar a rinforzar la valurisaziun en l'agricultura ed en il turissem cun purschidas autenticas.
La basa dal conclus da la regenza è il rapport "Analisa e strategia da l'agroturissem dal Grischun". Oz è quel vegnì preschentà per l'emprima giada a la publicitad. El cuntegna las finamiras, la strategia e las mesiras per l'agroturissem en il Grischun. Il rapport è vegnì elavurà dal post spezialisà per turissem e svilup persistent a Vargistagn per incumbensa dal departament d'economia publica e fatgs socials.
L'analisa ha mussà ch'i dat in grond potenzial per l'agroturissem en il chantun Grischun. L'agroturissem po purtar al Grischun dapli valurisaziun e promover en general il svilup persistent en las regiuns. Per l'agroturissem pleda er ch'el cumplettescha las purschidas turisticas existentas e ch'el rinforza las valurs e l'orientaziun dal turissem chantunal respectivamain da la marca "graubünden". Cun l'agroturissem vul la regenza pia er avischinar las acturas ed ils acturs dal turissem e da l'agricultura tras in augment cuminaivel da la valurisaziun e stgaffir purschidas cumplementaras per ils giasts en il Grischun.
Il chantun prenda l'iniziativa
La finamira èsi da stgaffir purschidas turisticas autenticas cudeschablas che han in connex cun l'agricultura. Il chantun tschertga per quest intent in sustegn professiunal e la colliaziun da las acturas e dals acturs, ina furma d'organisaziun optimala ed ina meglra commerzialisaziun da las purschidas agroturisticas. En il fratemp han cumenzà las lavurs en ils trais champs d'acziun organisaziun e rait (collavuraziun da las differentas acturas ed acturs), svilup da la purschida (sviluppar purschidas e products agroturistics, garanzia da la qualitad) sco er communicaziun e vendita (colliar purschidas, las render visiblas e cudeschablas sin chanals da vendita existents e novs). Per ils onns 2011 fin 2014 ha il chantun permess custs maximals dad 1,38 milliuns francs per tut ils champs d'acziun.
Il secretariat coordinescha l'agroturissem dal Grischun sin plaun operativ ed è pia cumpetent per la concepziun, per il manaschi e per l'ulteriur svilup da l'agroturissem en il Grischun. Per examinar e per sviluppar vinavant cuntinuadamain las finamiras strategicas è vegnida messa a disposiziun al secretariat ed a l'entir project ina gruppa accumpagnanta che consista da persunas da la pratica en questa branscha. L'interfatscha tranter l'agricultura ed il turissem duai vegnir activada tras il transferiment d'enconuschientschas tant da vart da l'agricultura sco er da vart dal turissem. Il secretariat per l'agroturissem dal Grischun ha cumenzà sia lavur operativa il 1. da fanadur 2011. El cumpiglia tranter auter ils secturs agroturistics (purschida d'eveniments, pernottaziuns, gastronomia, commerzialisaziun directa) e procura pass per pass per lur commerzialisaziun. Las puras ed ils purs èn ils acturs principals. Els duain integrar l'agroturissem en lur manaschi e sa basar sin sias fermezzas. Ultra da quai duain las puras ed ils purs savair, tge che giasts giavischan e per tge ch'els èn pronts da pajar in pretsch adequat.
Purtret e contact dal secretariat per l'agroturissem dal Grischun
Il secretariat è in servetsch per las puras e per ils purs che vulan investir or d'atgna iniziativa en l'agroturissem e collia represchentantas e represchentants dal turissem interessads cun l'agricultura. Il secretariat vegn manà da l'agentura "pluswert" a Cuira, sur in mandat dal chantun. Responsabels per la gestiun èn Christof Dietler, agronom SPF, spezialist da marketing e da raits en il sectur dal nutriment, e Sabina Schlosser, spezialista da turissem e hoteliera durant blers onns. La fin da 2011 vegn il secretariat ad activar ina pagina d'internet ed ad esser cuntanschibla er uschia.
Contact: Secretariat per l'agroturissem dal Grischun, Kornplatz 2, 7000 Cuira
tel.: 081 250 54 25, fax: 081 250 54 27.
Da la gruppa accumpagnanta dal project "Agroturissem dal Grischun“ fan part Barbara Buchli-Dönz, uniun purila grischuna; Rolf Hug, CFCA Plantahof; Jasmine Said Bucher, alpinavera; Rebecca Göpfert, post da cumpetenza per in turissem che s'accorda cun la natira e cun la cultura dal Grischun, Vargistagn; Alfons Cotti, pur; Myriam Keller, Grischun vacanzas; Oliver von Allmen, agroturissem Svizra; Andreas Züllig, societad dals hoteliers dal Grischun.
Il rapport "Analisa e strategia da l'agroturissem dal Grischun" è disponibel sin la pagina d'internet
www.alg.gr.ch.
Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01
- Aurelio Casanova, manader da l'uffizi d'agricultura e da geoinfurmaziun, tel. 081 257 24 31
Gremi: departament d'economia publica e fatgs socials
Funtauna: rg departament d'economia publica e fatgs socials