Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per giustia e segirezza dal cussegl grond ha predeliberà la missiva davart la realisaziun dal nov dretg da protecziun da l'uffant e da creschids. Ella propona al cussegl grond d'approvar il project cun intginas midadas la sessiun da december vegninta.

Durant dus dis da sesida, sut il presidi dal commember dal cussegl grond Luca Tenchio ed en preschientscha da la vicepresidenta da la regenza Barbara Janom Steiner sco er d'ulteriurs commembers da l'administraziun, ha la cumissiun per giustia e segirezza predeliberà la proposta da la regenza per concepir la revisiun totala dal dretg tutelar dal Grischun e deliberà ella per mauns dal cussegl grond.

Il nov dretg da protecziun da l'uffant e da creschids concludì da la confederaziun che entra en vigur il 1. da schaner 2013 ha per consequenza ch'ina organisaziun d'autoritads dal tuttafatg nova sto vegnir creada sin plaun chantunal. L'organisaziun tutelara vertenta vegn abolida e – en correspundenza cun la proposta da la regenza – remplazzada tras novas structuras.
Per la cumissiun n'èsi mai stà en dumonda da betg entrar en la missiva. Ella sustegna er unanimamain las 5 autoritads autonomas da protecziun da l'uffant e da creschids (APUC) proponidas da la regenza che duain vegnir finanziadas da nov dal chantun e che remplazzan las 17 autoritads tutelaras vertentas.
Las avugadias uffizialas vegnan remplazzadas tras las uschenumnadas assistenzas professiunalas. La cumissiun è per gronda part suandada l'opiniun da la regenza, tenor la quala las assistenzas professiunalas duain appartegnair da nov al champ da cumpetenza da la regiun e betg pli dal circul. En reguard finanzial ha quai per consequenza che las assistenzas professiunalas vegnan finanziadas da las vischnancas sco enfin ussa. Sut quest aspect pretenda ina minoritad da la cumissiun da chantunalisar er las assistenzas professiunalas.

Dumonda da surveglianza contestada
La cumissiun era malperina concernent la dumonda da princip, tge autoritad che stoppia surpigliar la surveglianza da las APUC. Ina pitschna maioritad è suandada la proposta da la regenza, la quala resguarda la surveglianza sco ina incumbensa administrativa e vul attribuir quella pervia da quai a sasezza. Ina ferma minoritad vuless percunter surdar la surveglianza a la dretgira chantunala. La finala vegn il cussegl grond a stuair respunder liantamain questa dumonda.
Dal rest è la cumissiun suandada unanimamain – cun in pèr paucas pitschnas midadas – las propostas da la regenza.
Suenter ina debatta detagliada ha la cumissiun decidì unanimamain da proponer al cussegl grond d'acceptar quest project che cumpiglia – ultra d'ina revisiun parziala da la lescha introductiva tar il cudesch civil svizzer – er ina revisiun parziala da la constituziun chantunala e l'adattaziun da differentas ordinaziuns dal cussegl grond.


Infurmaziuns:
Luca Tenchio, president da la cumissiun per giustia e segirezza dal cussegl grond, tel. 081 252 44 82


Gremi: rg cumissiun per giustia e segirezza
Funtauna: rg cumissiun per giustia e segirezza
Neuer Artikel