Zum Seiteninhalt

Communicaziun da la regenza dals 2 da favrer 2012

  • Erste Mitteilung
  • Neuen Beitrag einfügen

Il chantun promova vinavant il center da perscrutaziun per nanomedischina dal CSEM a Landquart. Suenter la fasa iniziala duain vegnir mess ils onns 2012 e 2013 intgins accents per il futur.

Contribuziun da promoziun per il center da perscrutaziun dal CSEM a Landquart
Il chantun Grischun sustegna l'ulteriur svilup dal center da perscrutaziun per nanomedischina a Landquart. Quel appartegna al center svizzer d'electronica e da microtecnologia SA (CSEM SA). La regenza ha garantì ina contribuziun da promoziun totala da 2 milliuns francs per ils onns 2012 e 2013. Vitiers vegn ina contribuziun dad 1 milliun francs en il rom da la nova politica regiunala (NPR). Questa contribuziun vegn finanziada da la confederaziun e dal chantun. Resalvadas restan la concessiun da credits dal cussegl grond per l'onn 2013 sco er l'approvaziun dal program da realisaziun da la NPR dals onns 2012 fin 2015 tras la confederaziun.

Las experientschas ch'èn vegnidas fatgas ils emprims 4 onns da gestiun han mussà ch'i dovra dapli temp che previs per installar e per consolidar la divisiun da perscrutaziun dal CSEM a Landquart (CSEM LQ). Pervia da la crisa finanziala ed economica n'han betg pudì vegnir cuntanschidas tut las finamiras ch'eran vegnidas formuladas il cumenzament. En il futur duai il center er sa drizzar pli fitg tenor l'industria regiunala. Quest punct furma tranter auter ina part integrala d'ina nova cunvegna da prestaziun tranter il chantun ed il CSEM SA. I dat potenzial da svilup. Il center prevesa d'engaschar fin l'onn 2013 circa 20 collavuraturas e collavuraturs qualifitgads. El gida uschia a perfecziunar forzas da lavur extraordinarias da l'industria regiunala. Ultra da quai profitescha la Val dal Rain alpin d'in augment da la valur da la regiun pervia da l'enconuschientscha dal CSEM SA sco er d'ina meglra colliaziun internaziunala. Quai augmenta las schanzas che ulteriuras firmas d'auta tecnologia sa domicilieschan en la regiun.

Plinavant s'orientescha il sectur da furmaziun e da perscrutaziun da la Val dal Rain alpin actualmain da nov. Quai gida a sviluppar vinavant ed a stabilir il center cun success. Ils chantuns Son Gagl e Grischun persequiteschan differents projects en il sectur dal transfer da savida e da tecnologia che influenzeschan il svilup futur dal CSEM LQ.

Mess en vigur la lescha da publicaziun
Ils 19 d'october 2011 ha il cussegl grond concludì il relasch da la lescha davart las collecziuns da leschas e davart il fegl uffizial (lescha da publicaziun). Ussa ha la regenza mess en vigur la lescha da publicaziun retroactivamain per il 1. da schaner 2012.

Avunda plazzas da scola speziala en il chantun Grischun
La regenza refusa da renconuscher ulteriuras plazzas da scola speziala en la chasa d'uffants Therapeion a Zizers. Il basegn da plazzas da scola speziala u da plazzas da lunga durada sco er plazzas da promoziun e da tgira (oravant tut per la distgargia durant las vacanzas e durant las fins d'emna) en instituziuns da scola speziala betg renconuschidas vegn valità sco betg avant maun. Ina dumonda correspundenta da la fundaziun da la chasa d'uffants Therapeion ha chaschunà questa decisiun. La chasa d'uffants Therapeion ha vulì sclerir uschia las premissas per ina eventuala fusiun cun la chasa d'uffants a Cuira.

Sboz da lescha per servetschs da segirezza privats a l'exteriur vegn beneventà
Servetschs da segirezza privats che vegnan prestads da la Svizra a l'exteriur duain vegnir reglads en ina nova lescha federala. En sia posiziun a la confederaziun sustegna la regenza grischuna la finamira dal sboz da la lescha. Tenor quel duain ils servetschs da segirezza privats che vegnan prestads a l'exteriur vegnir registrads a maun d'ina procedura d'annunzia. Tschertas activitads duain vegnir scumandadas tras lescha da bel principi (p.ex. scumond dal servetsch mercenar). Sa retegnair uschè fitg sco pussaivel ston ins percunter – tenor la regenza grischuna – tar l'excorporaziun da cumpetenzas per applitgar sforz polizial u mesiras polizialas. E quai malgrà ch'il stadi pudess tuttavia avair interess da sa laschar distgargiar en il sectur da segirezza tras instituziuns privatas.

Da vischnancas e da regiuns

  • Landquart: La nova constituziun dals 27 da november 2011 da la vischnanca da Landquart, resultada tras la fusiun da las vischnancas dad Igis e da Mastrils, vegn approvada.
  • Mesauc: Il project «Strada forestale Gumegna, Tratta Deira – Cianzela» che l'uffizi da guaud e privels da la natira ha inoltrà per incumbensa da la vischnanca da Mesauc vegn approvà. Als custs vegn garantida ina contribuziun da maximalmain 1'260'000 francs.
  • Zuoz: La revisiun parziala da la planisaziun locala, concludida da la vischnanca da Zuoz ils 29 da zercladur ed ils 3 d'avust 2011, vegn approvada. La revisiun parziala cuntegna l'engrondiment da las zonas da mastergn en il territori "Resgia" e "Curtinellas" sco er l'adattaziun da la zona da privel en il territori "Crasta".
  • Signuradi/Tschintg Vitgs: Ils statuts da la corporaziun regiunala "Signuradi/Tschintg Vitgs" vegnan approvads. Cun la fundaziun da la corporaziun regiunala il 1. da schaner 2012 sortan a medem temp las vischnancas da Fläsch, dad Igis/Mastrils (resp. da Landquart), da Jenins, da Maiavilla, da Malans, da Trimmis, da Vaz sut e da Zizers da la corporaziun regiunala dal Grischun dal nord.

Gremi: regenza
Funtauna: rg chanzlia chantunala dal Grischun

Neuer Artikel