Cuntegn da la pagina

Communicaziun da la regenza dals 16 da favrer 2012

  • Erste Mitteilung
  • Neuen Beitrag einfügen
La regenza grischuna ha mess la chasa da parturir a Jenins sin la glista dals ospitals. Plinavant ha ella fixà provisoricamain las pauschalas pro cas per ils ospitals acuts dal Grischun sco er approvà trais cunvegnas da program cun la confederaziun.

La chasa da parturir a Jenins è ussa sin la glista dals ospitals
Tenor il conclus da la regenza vegn la glista dals ospitals dal chantun Grischun cumplettada cun la chasa da parturir dal Grischun a Jenins. L'incarica da prestaziun exista per l'assistenza al part a partir da la 37. emna da gravidanza cun dus letgs da pazientas. Tenor l'avis da la regenza è la raschun per integrar la chasa da parturir sin la glista dals ospitals la circumstanza che la purschida da questa chasa sa differenziescha da tut ils ospitals e da tut las clinicas che figureschan sin la glista dals ospitals. Plinavant ha quai pitschnas consequenzas per la planisaziun dals ospitals. En il chantun Grischun datti mintga onn tut en tut circa 1640 naschientschas. Per la chasa da parturir a Jenins vegni quintà cun ca. 40 naschientschas.

Fixà provisoricamain las pauschalas pro cas per ils ospitals acuts dal Grischun
Per il cumenzament da l'onn ha la regenza fixà en moda superprovisorica las pauschalas pro cas per il rendaquint da prestaziuns staziunaras dals ospitals acuts grischuns, perquai ch'ils ospitals e las assicuranzas da malsauns n'eran betg vegnids da s'accordar davart l'autezza da talas (communicaziun da la regenza dals 5 da schaner 2012). Fin la fin da schaner han ils partenaris da tariffa gì temp da prender posiziun en chaussa. Suenter la scadenza da quest termin ha la regenza ussa fixà provisoricamain las pauschalas pro cas senza midadas. Quellas valan fin che la procedura per la fixaziun da las tariffas è terminada.

Approvà trais cunvegnas da program cun la confederaziun
Tras la nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF), ch'è entrada en vigur il 1. da schaner 2008, è vegnì introducì l'instrument da la cunvegna da program. Uschia èsi previs che incumbensas communablas restantas vegnan regladas ed ademplidas tras cunvegnas tranter la confederaziun ed ils singuls chantuns, uschenavant che quai è cunvegnent. La regenza grischuna ha approvà trais cunvegnas da program per ils onns 2012 fin 2015 tranter l'uffizi federal d'ambient ed il chantun Grischun. Quellas concernan il sectur "territoris per la protecziun da la selvaschina e dals utschels da l'aua", il sectur "protecziun cunter la canera e cunter suns" ed il sectur "ovras da protecziun cunter l'aua". Da las prestaziuns concludidas ha la regenza prendì enconuschientscha. Resalvada resta l'approvaziun dals credits annuals tras il cussegl grond.

Mess en vigur duas leschas
A chaschun da sia ultima sesida ha la regenza concludì da metter en vigur ils suandants relaschs:
- La lescha davart la surveglianza da las finanzas dals 19 d'october 2011 vegn messa en vigur per il 1. da mars 2012.
- La revisiun parziala da la lescha davart il traffic public en il chantun Grischun vegn messa en vigur retroactivamain per ils 31 d'october 2011.


Projects da vias
La regenza ha approvà en tut 6'860'000 francs per lavurs da construcziun sin ils suandants trajects:
- via naziunala A28: lavurs d'impressari e da cuvrida, sviament da Saas, punt a spunda Wieseli
- via dal Meir: lavurs d'impressari e da cuvrida, Freihof-Solas, mir da sustegn Calabria


Gremi: regenza
Funtauna: rg chanzlia chantunala dal Grischun
Neuer Artikel