Navigation

Inhaltsbereich

  • Erste Mitteilung
  • Neuen Beitrag einfügen

Per sviluppar vinavant la politica d'integraziun chantunala è vegnida stgaffida ina nova basa: Per incumbensa da la regenza ha ina cumissiun d'integraziun sustegnida da differentas varts elavurà directivas per promover l'integraziun da persunas estras en il Grischun. Las directivas cuntegnan recumandaziuns per tut las acturas ed ils acturs ch'èn pertutgads da l'integraziun.

L'integraziun è ina incumbensa principala dal stadi e da la societad. La confederaziun, ils chantuns e las vischnancas ston stgaffir cuminaivlamain cundiziuns favuraivlas per l'egualitad da las schanzas e per la participaziun da la populaziun estra a la vita publica. Per la direcziun strategica da la promoziun da l'integraziun da persunas estras en il Grischun ha la regenza installà il mars 2010 ina cumissiun d'integraziun manada da Patricia Ganter, l'incumbensada chantunala d'integraziun. Represchentantas e represchentants da las vischnancas, da l'economia, da las baselgias chantunalas e cuminanzas religiusas, da federaziuns, uniuns ed organisaziuns sco er da la populaziun residenta estra han resumà las directivas per promover l'integraziun en in rapport. Questas directivas èn decisivas ils proxims onns per las activitads dal chantun e da las vischnancas. Ellas servan sco basa per elavurar normas giuridicamain liantas eventualmain necessarias sin plaun chantunal e communal.

En ses rapport ha la cumissiun enumerà ils champs d'acziun ils pli impurtants ch'èn relevants per l'integraziun en il futur e formulà recumandaziuns respectivas. Questas recumandaziuns han las suandantas finamiras:

  • promover la chapientscha da las linguas e la communicaziun tranter las culturas sin tut ils plauns; 
  • intermediar infurmaziuns che s'orienteschan als basegns tant a persunas immigradas sco er a persunas indigenas; 
  • ina politica da furmaziun che stgaffescha las premissas meglras pussaivlas per avair success en scola e per entrar en il mund professiunal; 
  • in'economia che surpiglia sia responsabladad sociala en il sectur da l'integraziun e che avra perspectivas professiunalas per sias collavuraturas e per ses collavuraturs esters; 
  • posts d'administraziun ch'èn sensibilisads per l'interculturalitad e che rendan accessiblas lur prestaziuns a tuttas ed a tuts.

Exempels per ina promoziun pli intensiva da l'integraziun
Savend che gia oz vegn fatg bler per integrar la populaziun residenta estra – cunzunt en scola ed a la plazza da lavur – ha la cumissiun elavurà ina massa propostas. Intgins exempels: Ina purschida da curs da lingua facils duai er cuntanscher persunas che n'èn betg disadas d'emprender. Interpretas ed interprets interculturals duain vegnir engaschads pli savens en scola sco er en il sectur social ed en il sectur da la sanadad. Persunas estras immigradas da nov duain vegnir infurmadas meglier. Uffants da la vegliadetgna prescolara cun dischavantatgs socials generals duain vegnir promovids. En scola duai vegnir rinforzada la collavuraziun cun geniturs da lingua estra. Giuvenils da lingua estra duain vegnir sustegnids meglier tar la midada en il mund professiunal. Mesiras simplas che porschan qualificaziuns professiunalas duain facilitar l'entrada en il martgà da lavur.

Oz èn var 32'000 persunas en il chantun Grischun da naziunalitad estra. Ellas derivan da 122 naziuns. Ina integraziun cun success n'è betg ina schanza mo per la populaziun residenta estra, mabain er per l'economia e per la societad. Tenor il princip "promover e pretender" maina l'integraziun ad ina convivenza buna e paschaivla e rinforza la solidaritad. Respect vicendaivel e perspectivas da svilup per tuttas e per tuts èn da gronda impurtanza en quest connex.


Infurmaziuns:
- presidenta da la regenza Barbara Janom Steiner, scheffa dal departament da giustia, segirezza e sanadad, tel. 081 257 25 01
- Patricia Ganter, incumbensada chantunala d'integraziun, tel. 081 257 36 81


Gremi: regenza
Funtauna: rg chanzlia chantunala dal Grischun

Neuer Artikel