Cuntegn da la pagina

La politica da vegliadetgna survegn ina nova orientaziun

  • Erste Mitteilung
  • Neuen Beitrag einfügen

Dumagnar las sfidas demograficas e metter a disposiziun purschidas colliadas per ina generaziun activa en la vegliadetgna: Quai cuntegna il model directiv pertutgant la vegliadetgna dal Grischun 2012.

La structura da las vegliadetgnas sa mida en la societad. Er en il chantun Grischun crescha il dumber d'umans attempads (65 onns e dapli) e fitg attempads (80 onns e dapli) fermamain. Cumpareglià cun l'onn 1980 vegn il dumber d'umans attempads a crescher fin l'onn 2030 per dapli ch'il dubel da circa 22'400 sin 47'400 ed il dumber d'umans fitg attempads per dapli che trais giadas da 4'160 sin passa 14'140.

Il nov model directiv pertutgant la vegliadetgna dal Grischun 2012 prescriva l'orientaziun da la politica da vegliadetgna futura dal chantun Grischun en ils secturs da la prevenziun da la sanadad sco er da la tgira e da l'assistenza d'umans pli vegls. El enumerescha mesiras concretas che duain vegnir realisadas dal chantun e da las vischnancas sco er da las organisaziuns nunguvernamentalas. Sut la direcziun da l'uffizi da sanadad è il model directiv vegnì elavurà en in process da plirs pass ensemen cun represchentantas e represchentants da differentas organisaziuns professiunalas. La regenza grischuna ha prendì enconuschientscha dal model directiv ed ha approvà las finamiras strategicas ch'el cuntegna.

Trais finamiras cun mesiras concretas
Las trais finamiras da la nova politica da vegliadetgna che la regenza ha fixà sa cloman: "rinforzar l'autonomia, la sanadad e la qualitad da viver dals umans pli vegls per augmentar il dumber dals onns da vita sauns e per retardar l'entrada en ina chasa da tgira", "reducir las abitantas ed ils abitants da chasas da tgira a persunas che ston stringentamain vegnir tgiradas en ina chasa da tgira", "meglierar la colliaziun e collavuraziun da las differentas purschidas da tgira e d'assistenza sco er infurmar en ina moda che tegna quint dals basegns da las persunas che s'interessan per dumondas da la vegliadetgna e per purschidas da tgira e d'assistenza".
Ultra da quai duain vegnir realisadas tranter auter las suandantas mesiras:

  • L'uffizi da sanadad elavura in concept per in program chantunal per la promoziun da la sanadad en la vegliadetgna. Latiers tutga er la cuntinuaziun dal project da success "Insieme sano – gemeinsam gesund" per promover la sanadad e la qualitad da viver da la populaziun pli veglia en las vischnancas. Quest project integrescha las gruppas en mira – en il senn d'in process cooperativ – en las planisaziuns ed en las decisiuns. 
  • La part da la populaziun residenta dad 80 onns e dapli che viva en ina chasa da tgira duai vegnir reducida fin l'onn 2030 a main che 20 pertschient (2010: 25 pertschient). Quai premetta – er perquai ch'il dumber da questa gruppa da la populaziun che crescha fitg ferm – purschidas alternativas da tgira e d'assistenza sco er in abitar assistì u structuras da di e da notg. Il chantun definescha en l'avegnir – ultra dal basegn da letgs en chasas da tgira – er il basegn da purschidas alternativas da tgira e d'assistenza e sustegna las vischnancas a realisar questas purschidas. 
  • Il chantun endrizza in portal d'internet, sin il qual las organisaziuns ch'èn activas en il Grischun mettan lur link ed infurmaziuns che stattan en connex cun il tema da la vegliadetgna sco er infurmaziuns davart las differentas purschidas. Las vischnancas procuran da lur vart per l'installaziun da forums regiunals da colliaziun.

Partenza a l'emprim forum grischun per dumondas da vegliadetgna
Il nov model directiv vegn preschentà l'emprima mesadad da l'onn 2012 ad in vast public a chaschun d'in forum grischun per dumondas da vegliadetgna. Il forum è quasi il "tact inizial" per realisar las mesiras proponidas. En il futur organisescha il chantun mintga dus onns in forum per dumondas da vegliadetgna. En il center stat la colliaziun dals acturs publics e privats e da las organisaziuns publicas e privatas dal sectur da vegliadetgna. Al forum vegnan plinavant discutadas tendenzas actualas e strategias.


Infurmaziuns:
- presidenta da la regenza Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun

Neuer Artikel